OQO-nyń ártisteri Fınlıandııanyń úsh qalasynda óner kórsetti
ShYMKENT. QazAqparat - Ońtústik Qazaqstan oblysynyń ártisteri Fınlıandııa Respýblıkasynyń Helsınkı qalasynda ótip jatqan «Jumbaq Jibek joly» Halyqaralyq ashyq Ortaazııalyq festıvaline Qazaqstannyń atynan qatysýda, dep habarlaıdy QazAqparat tilshisi.
Ánshilerdiń quramynda Shámshi Qaldaıaqov atyndaǵy oblystyq fılarmonııanyń dástúrli ánshisi, QR Mádenıet qaıratkeri Abylaıhan Ospanov pen Ulbala Ermuhametova, Oblystyq opera jáne balet teatrynyń solısteri Erlan Jandarbaı jáne Úrálhan Seılbekova, oblystyq mádenıet jáne halyq shyǵarmashylyǵy ortalyǵynyń bólim basshysy Muratbaı Nurmaǵanbetovter bar. Qazaqstannyń Fınlıandııadaǵy Elshiliginiń habarlaýynsha, ońtústikten attanǵan óner maıtalmandary fın eliniń Helsınkı, Leppa Korpı qalalarynda óner kórsetip, sheteldikterdiń aıryqsha yqylasyna bólenýde. Óz kezeginde Fınlıandııadaǵy Qazaqtar qaýymdastyǵynyń tóraıymy Gaýhar Almahanova da ánshilerge óz alǵysyn aıtyp, jyly lebizin bildirdi.
«Eldiń dástúrli áni, kúmbirlegen kúıi men myń buralǵan bıi Qazaq eliniń ystyq yqylasy men sálemin jetkizgendeı. Bıylǵy Ulystyń uly kúni aıryqsha este qalarlyqtaı. Barlyqtaryńyzǵa amandyq, denderińizge saýlyq, eldigi men keńdigin óner arqyly da pash etken daryndy eldiń daryndy urpaqtaryna shyǵarmashylyq órleý, tabystar tileımin"-dedi Gaýhar Almahanova.
Ońtústiktiń kúmis kómeı ánshileri aldaǵy kúnderi Fınlıandııanyń taǵy da birqatar qalalarda óner kórsetedi dep kútilýde.
