OQO mýzeıleriniń qundy jádigerleri Astanaǵa jetkizildi
ASTANA. QazAqparat - Ońtústik Qazaqstan oblysynyń Astana qalasyndaǵy kúnderi aıasynda Astanadaǵy «Qazaqstan» ortalyq kontsert zalynyń foıesinde OQO mýzeıleriniń qundy jádigerlerinen jasaqtalǵan «Jer kindigi - Qazyǵurt» kóp salaly ǵylymı kórkemóner kórmesi ashyldy, dep habarlaıdy QazAqparat.
«Kórmeniń maqsaty - qundy jádigerlerden jasaqtalǵan kórme arqyly Astana qonaqtary men jurtshylyǵyn Qazaqstan tarıhynda súbeli orynǵa ıe bolǵan Ońtústiktiń tarıhı shejiresi jáne sýretshiler qylqalamy men qolónershilerdiń sheberliginen týǵan óner shyǵarmalarymen tanystyrý. Ońtústik óńiri tarıhı-mádenı eskertkishterge toly aımaq. «Jer kindigi - Qazyǵurt» kóp salaly ǵylymı kórkemóner kórmesinde kezeń-kezeńimen tarıhı shejireden syr shertetin belgili qylqalam ıeleriniń shyǵarmalary, qolóner sheberleriniń jasaǵan buıymdary men tarıhı fotosýretteri jáne OQO mýzeıleriniń jádigerleri kórsetiledi», - deıdi uıymdastyrýshylar.
Osy oraıda «Ońtústik tabıǵaty» taqyrybynda óńirdiń ásem tabıǵat kórinisterinen fotosýretter men keskindemelik jumystar, qazba baılyqtardyń úlgileri, Kentaýdaǵy taý-ken tarıhy mýzeı qorynan, Saıram, Ógem, Qarataý taýlarynyń, Aqsý - Jabaǵyly qoryǵynyń fotosýretteri, Kelinshek taý, Túlkibas, Qazyǵurt taýy jáne oblys tabıǵatyn beıneleıtin keskindemelik kartınalar qamtylǵan.
Al «Kóneniń kózi - tarıhtyń ózi» bóliminde kóne Otyrar kalasynan arheologııalyq qazba jumystary kezinde tabylǵan qysh qumyralar, kúmis teńgeler t.b. qundy jádigerler, Túrkistan Q.A. ıAsaýı kesenesiniń maketi, ejelgi qalalardyń fotosýretteri, aerofotosýretter, taqyrypqa baılanysty keskindemelik kartınalar, qyshtan jasalǵan ydystar kórsetilgen.
Budan bólek, «Qol ónerim-ónegem» taqyryby boıynsha qazaq halqynyń etnografııalyq kollektsııalary: aıaqqaptar, qorjyndar, shashaqbaýlar, basqurlar, zergerlik buıymdar, kádesyılyqtar jáne basqa da ulttyq buıymdar kópshilik nazaryna usynyldy.
Sonymen qatar «Handyq dáýir» bóliminde handyq dáýirdi kórsetetin keskindemelik kartınalar, saýyt, qarý-jaraq, Han taǵy, sondaı-aq Taıqazan syndy mańyzdy jádigerler qamtylǵan.
«Elbasy jáne Ońtústik» taqyrybynda Prezıdent N. Á. Nazarbaevtyń Táýelsizdik jyldaryndaǵy ońtústikke saparlary kezinde túsirilgen fotosýretter toptamalarymen tanysýǵa bolady. Kórmedegi «Syry bir sýretter» bóliminde «Túrkistan-Túrki áleminiń mádenı astanasy» aıasynda TÚRKSOI sýretshileriniń jınaqtamasynan qazaq halqynyń turmys tirshiligin, salt-dástúrin, ádet-ǵurpyn, mádenıetin jáne OQO tabıǵatyn beıneleıtin keskindemelik shyǵarmalar usynylǵan.
Aıta keteıik, bul mádenı shara Elbasy N.Á.Nazarbaevtyń «Bolashaqqa baǵdar: «Rýhanı jańǵyrý» maqalasyndaǵy «Týǵan jer» baǵdarlamasyn nasıhattaý maqsatynda uıymdastyrylǵan.
