OQO mýzeıinde Olımpıada chempıony Bekzat Sattarhanovtyń sporttyq kıimderi saqtaýly

ShYMKENT. QazAqparat - Ońtústik Qazaqstan oblysynyń tarıhı-ólketaný mýzeıinde mektep oqýshylaryna  tegin ekskýrsııa uıymdastyryldy. Óńirdiń  ár qala, aýdanynan kelgen balalar  murajaıdaǵy tarıhı jádigerlermen tanysty, dep habarlaıdy QazAqparat tilshisi.

Aıtýly shara Elbasy N.Á.Nazarbaevtyń «Bolashaqqa baǵdar: rýhanı jańǵyrý»  maqalasy aıasynda  balalardyń el tarıhy men mádenıetin bilý, óz Otanynyń taǵdyryna, onyń  ótkenine, búgini men bolashaǵyna ózi qatysty ekendigin sezinýi maqsatynda uıymdastyryldy. Onda ata-anasynyń qamqorlyǵynsyz qalǵan jetkinshekter "Oblys tarıhy-2017" dep atalatyn kerýen-sherýge qatysyp, oblystaǵy eń úlken murajaıdy aralaýǵa múmkindik aldy.

Uıymdastyrýshylardyń aıtýynsha, ıgi shara balalardyń óz Otanyna degen súıispenshiligi men azamattyq sana sezimi negizinde óz eline paıda keltirýge degen talpynysyn qalyptastyrý baǵytynda ótkizildi.

Murajaı qyzmetkerleri saıahattap kelgenderge ólkeniń arheologııasy men paıdaly qazbalary, dárilik shópteri týraly keńirek maǵlumat berdi. Balalarǵa kúsh atasy Qajymuqan Muńaıtpasulynyń urpaqtary syılaǵan kıiz úı qatty unady. Sonymen qatar ólkeniń maqtanyshy bolǵan boksshy, Sıdneı Olımpıadasynyń chempıony Bekzat Sattarhanovtyń sporttyq kıimderi tań tamasha etti. Jetkinshekterde ońtústiktiń  tarıhy men mádenıetine degen maqtanysh sezimi uıalap, kóterińki kóńil-kúımen tarqasty.