OQO men Ózbekstannyń saýda aınalymy 622,6 mln AQSh dollaryna jetti
ShYMKENT. QazAqparat - Ońtústik Qazaqstan oblysynyń ákimi Janseıit Túımebaev Ózbekstan Respýblıkasynan kelgen bir top zııaly qaýym ókilderimen kezdesti. Basqosýda taraptar eki el arasyndaǵy strategııalyq áriptestik, iskerlik qarym qarym-qatynas, mádenı yqpaldastyq ornatý jaıyn sóz etti, dep habarlaıdy QazAqparat tilshisi.
Aımaq basshysy, sondaı-aq, biregeı mádenı-rýhanı baılanystar men búginde jalǵasyn taýyp kele jatqan eki jaqty dostyq qarym-qatynastyń mańyzdylyǵyna toqtaldy.
«Eki el arasyndaǵy strategııalyq áriptestik ońtústiktiń qasıetti oryndarynyń biri - Ordabasyda osydan 25 jyl buryn ótken eldik jıynda qabyldanǵan «Máńgilik dostyq týraly» kelisimmen nyqtalǵan. Ózderińizge belgili bıylǵy 15 naýryzda Astana qalasynda Ózbekstannyń Qazaqstandaǵy jyly jarııalanyp, saltanatty jaǵdaıda ashyldy. Barshańyzǵa málim, sońǵy bir jarym jyldyń ishinde Qazaqstan men Ózbekstan arasynda dostyq baılanystar bekip, jańa deńgeıge kóterilip keledi. Búginniń ózinde temirjol tasymaly 44 paıyzǵa arttyp, taýar aınalymy 2 mıllıard dollarǵa jetti», - dedi Janseıit Qanseıituly.
Kezdesý barysynda sóz alǵan Ózbekstan Respýblıkasy Jazýshylar Odaǵynyń tóraǵasy Muhammed Álı baýyrlas eki el arasyndaǵy dánekerlikti nyǵaıtý baǵytynda atqarylyp jatqan keshendi is-sharalardyń odan ári jandana túsetinine senim bildirdi. Kezdesýdi qorytqan oblys ákimi óńirde ótkizilip otyrǵan Ámir Temirdiń 682 jyldyǵyna arnalǵan ǵylymı tájirıbelik konferentsııaǵa sáttilik tiledi.
Aıta keteıik, ótken jyly Elbasymyz Nursultan Nazarbaevtyń Ózbekstanǵa jasaǵan jumys sapary aıasynda memleketaralyq baılanysty odan ári nyǵaıtýǵa arnalǵan 10 mańyzdy qujat qabyldansa, Ońtústik Qazaqstan oblysynyń ákimdigimen saýda-ekonomıkalyq jáne mádenı gýmanıtaralyq salalardaǵy yqpaldastyqty arttyrý baǵytynda Tashkent, Syrdarıa, Jyzaq oblystary basshylarmen áriptestik memorandýmǵa qol qoıyldy. Elbasynyń osy sapary aıasynda qazaq-ózbek bıznes forýmy uıymdastyrylyp, oǵan qos yeldiń 300-den astam kásipkerleri qatysty. Dál osyndaı iskerlikti nyǵaıtýǵa baǵyttalǵan is-sharalar Shymkentte de ótip, Tashkent qalasy taýaróndirýshileriniń kórmesi uıymdastyrylǵan bolatyn. Búginde Ózbekstan Ońtústik Qazaqstan oblysynyń saýda áriptesi bolyp tabylady. Ekejaqty taýar aınalymy 20,3 paıyzdy quraıdy. 2017 jyly saýda baılanysy 11,7 paıyzǵa artyp, 622,6 mln AQSh dollaryna jetti.
Sondaı-aq, búginde oblystaǵy 3 mıllıonǵa jýyq turǵynnyń 17 paıyzyn ózbek etnosynyń ókilderi quraıdy. Oblystaǵy 15 mektepte bilim ózbek tilinde bilim berilse, sondaı-aq, aralas tildi 50 mektepte ózbek klastary bar. Sonymen qatar, respýblıkamyzdaǵy jalǵyz ózbek drama teatryda osy óńirde ornalasqan. Jalpy, oblys aýmaǵynda 4 gazet ózbek tilinde jaryq kórse, 3 telearna qazaq - orys - ózbek tilderinde habar taratady. Oblys aýmaǵynda Qazaqstan ózbekteri etnomádenı birlestikteriniń «Dostyq» qaýymdastyǵy men oblystyq ózbek etnomádenı birlestigi jáne onyń aýdandyq, qalalyq 13 fılıaly jumys isteıdi.
