OQO men Qyzyl teńiz provıntsııasy arasynda yntymaqtastyq memorandýmy jasaldy
ASTANA. QazAqparat - Ońtústik Qazaqstan oblysy men Qyzyl teńiz provıntsııasy arasynda yntymaqtastyq týraly memorandýmǵa qol qoıyldy, dep habarlaıdy OQO ákimdiginiń baspasóz qyzmetine silteme jasap.
Ońtústik Qazaqstan oblysy ákiminiń orynbasary T.Sársembaev Egıpettiń Qyzyl teńiz provıntsııasynyń gýbernatory Ahmed Abdallamen, Ońtústik Sınaı provıntsııasynyń gýbernatory Haled Fodamen jáne Mysyr Arab Respýblıkasynyń Qazaqstandaǵy Tótenshe jáne Ókiletti Elshisi Haısam Ibrahımmen kezdesti.
Kezdesý barysynda taraptar Qazaqstan-Egıpet arasyndaǵy qarym-qatynastyń qarqyndy ári kópqyrly baǵytta damyp otyrǵandyǵyn atap ótti.
Osy baǵyttaǵy jumystardy odan ári damytý maqsatynda jáne dostastyq pen baýyrlastyq baılanysty nyǵaıtý úshin Ontústik Qazaqstan oblysy men Qyzyl teńiz provıntsııasy arasynda memorandýmdy jasaldy.
Kelisim sheńberinde Ońtústik Qazaqstan oblysy men Qyzyl teńiz provıntsııasy arasyndaǵy ózara yntymaqtastyq ekijaqty seriktestik qatynastar men ekonomıkalyq, mádenı, ǵylymı, tehnıkalyq, sporttyq, ekologııalyq jáne týrıstik salalarda júzege asyrylady.
Kezdesýde sóz alǵan oblys ákiminiń orynbasary T.Sársenbaev búginde Ońtústik Qazaqstan oblysynyń qarqyndy damyp kele jatqan qýatty ekonomıkalyq áleýet shoǵyrlanǵan óńir ekenin atap ótti.
«Oblystyń ekonomıkasy ártaraptandyrylǵan. Shıkizatty satýdan táýeldi emespiz - óńir ekonomıkasynyń 60 paıyzdan astamy óńdeý ónerkásibinde. Munda shaǵyn jáne orta bıznes damyǵan, máselen, oblysta 177 myńnan astam bıznes sýbektileri tirkelgen. Bizdiń oblysymyzda sheteldik ınvestorlarǵa barlyq qolaıly jaǵdaılar qarastyrylǵan. Búginde oblysymyzda Indýstrıaldy-ınnovatsııalyq baǵdarlama aıasynda 11 ındýstrıaldyq jáne 1 arnaıy ekonomıkalyq aımaq jumys isteıdi.
Sondaı-aq, Ońtústik Qazaqstan oblysy ákimdigi janynan túrli salalardaǵy ınvestıtsııalyq jobalardy 3 mln. AQSh dollaryna deıin birlesip ınvestıtsııalaýǵa múmkindigi bar qarjylyq ınstıtýttar qurylǵanyn aıtqym keledi», - dedi T.Sársembaev.
Gýbernator Ahmed Abdalla bul is-shara eki el arasyndaǵy saýda-ekonomıkalyq, týrıstik jáne mádenı baılanystardy damytýǵa múmkindik beretindigine senim bildirdi.
Aıta keteıik, «Qyzyl teńiz» provıntsııasy - Mysyr eliniń shyǵysynda ornalasqan Qyzyl teńiz jaǵalaýy boıyndaǵy oblys.
