OQO mektepterindegi zańsyz aqsha jınaý máselesi talqylandy
Oblys ákiminiń orynbasary Ulasbek Sádibekovtyń tóraǵalyǵymen ótken jıynǵa óńirdegi ulttyq bıýro men bilim berý uıymdarynyń basshylary, zań organdarynyń, kásipodaq jáne halyqqa qyzmet kórsetý ortalyǵynyń ókilderi qatysty. Sondaı-aq beıne konferentsııalyq baılanys arqyly qala-aýdan ákimderi men olardyń salaǵa jaýapty orynbasarlary, bilim bólimderiniń basshylary, kolledj, mektep dırektorlary da tyńdady. Jıyn barysynda qatysýshylar mektepterdegi zańsyz aqsha jınaý, sondaı-aq jumysqa ornalasý úshin para berý máseleleri jıi oryn alatynyn sóz etti. Óz kezeginde Ulasbek Sádibekov sybaılastyqqa jol bergen azamattar jazasyz qalmaıtynyn jetkizdi.
«Aýdandyq bilim bólimi nemese ádistemelik kabınet mektepterden túrli qajeti de, qajetsiz málimet pen esep aldyrtady. Sol beriletin málimettiń sapasy tómen bolsa, mektep muǵalimin qaıta sandaltý bastalady. Munyń sońy para usyný jaǵdaıyna deıin alyp barady. Mine, osy máseleni jaýapty azamattarǵa qolǵa alýdy tapsyramyn», - dedi Ulasbek Sádibekuly.
Jıynda para alý kezinde ustalǵan mektep dırektorlaryna qatysty beıne túsirilimder kórsetildi. Ondaǵy málimet boıynsha 2017 jyly oblystyń bilim salasynda sybaılas jemqorlyqqa qatysty 19 is tirkelgen. Al, 2016 jyly 7 oqıǵa oryn alypty.
Sondaı-aq, jıynda bilim salasyndaǵy sybaılas jemqorlyqty boldyrmaý, qyzmet sapasyn jaqsartý maqsatynda engizilgen tsırlandyrý júıesiniń artyqshylyqtary keńinen sóz boldy. Elektrondy memlekettik qyzmetterdi nasıhattaý qajettigi aıtyldy. Aıtalyq, oblysta oqýshylardy birinshi synypqa qabyldaý jáne muǵalimderdi jumysqa turǵyzý protsesteri tolyǵymen elektrondy formatqa ótkizilgen. Respýblıkada alǵash ret qolǵa alynǵan joba óziniń oń nátıjesin berip keledi. Sonymen qatar qyzmet berýshi men qyzmet alýshylardyń arasyndaǵy tikeleı baılanysty azaıtý úshin halyqqa memlekettik qyzmetterdi elektrondy portaly arqyly alý tásilderin úıretý máseleleri talqylandy.
Aıta keteıik, búginde azamattarmen tıimdi keri baılanys ornatý maqsatynda memkyzmet.kz saıtynda arnaıy «Bilim» aıdary men +7 775 869 21 21 nómiri boıynsha WhatsApp jelisi jumys isteýde.