OQO qysqa daıyndyqty qazirden bastap ketti
ShYMKENT.QazAqparat - Ońtústik Qazaqstan oblysynda qysqa daıyndyq jumystary qyzý júrgizilip jatyr. Búgingi tańda 2677 mekemege 102 myń tonna qatty otyn jetkizilgen. Bul týraly Oblystyq energetıka jáne turǵyn úı-kommýnaldyq sharýashylyq basqarmasynyń basshysy Marǵulan Maraıym málimdedi, dep habarlaıdy «QazAqparat HAA tilshisi.
Basqarma basshysynyń sózinshe, oblystaǵy 3209 bıýdjettik mekemelerdiń aldaǵy jylý maýsymyna daıyndyǵy 83 paıyzdy quraǵan.
«Búginge deıin bilim salasyna qajetti 134 myń tonna qatty otynnyń 72,5 myń tonnasyn, densaýlyq saqtaý salasyna qajetti 27,5 myń tonnanyń 25,5 myń tonnasyn, mádenıet salasyna 422 tn, sport salasyna 1,7 myń tn, jumyspen qamtý salasyna 1,7 myń tn. qatty otyn jetkizip úlgerdik. Sol sııaqty oblystaǵy bıýdjettik mekemelerge qajetti suıyq otyn kólemi 5,8 mln lıtr bolsa, búgingi kúnge tasymaldanǵany 2,6 mln lıtr, ıaǵnı, jumystar 45%-ǵa oryndaldy. Ortalyqtandyrylǵan jylýmen qamtamasyz etetin mekemelerge qajetti qatty otyn (kómir) kólemi 106,014 myń tonna, tasymaldanǵany 16 myń tn. (15%). Qazirgi kezde tek qana «KentaýServıs» MKK tasymaldanýda. Bul jumystar áli de jalǵasyn tabady», - dedi Marǵulan Maraıym.
Sonymen birge, baspasóz jıynynda basqarma basshysy ortalyqtandyrylǵan jylýmen qamtamasyz etiletin kópqabatty turǵyn úılerdiń jaıyna da toqtaldy. Aıtýynsha, osy jyldyń 1 qarashasyna deıin 2327 kópqabatty turǵyn úı ortalyq qazandyqqa qosylýy tıis. Ázirge, 1150 turǵyn úı jylý berýge daıyn bolsa, munyń úlestik salmaǵy 49 paıyzǵa teń.
Sala mamandary «Nurly jol» baǵdarlamasy jáne oblystyq bıýdjet qarjysy arqyly ortalyqtandyrylǵan jylý qubyrlarynyń 31 shaqyrymyn (barlyǵy 58,3 shq.) qaıta qurý jáne aǵymdaǵy jóndeý jumystarynan ótkizgen. Al ortalyqtandyrylǵan aýyz sý qubyrlaryn qaıta qurý jumystaryna kelsek, jóndeýden ótýi tıis 75,3 shaqyrym sý qubyrynyń qazirgi tańda 50,4 shaqyrymy (67%) jumysqa saqadaı saı. Jumystardy aıaqtaý qazan aıynyń 15-ne josparlanyp otyr.
