OQO qutqarýshylary sý tasqynynyń aldyn alýǵa daıyndalyp jatyr
ShYMKENT. QazAqparat - Ońtústik Qazaqstan oblysynda tótenshe jaǵdaılar qyzmeti sý tasqynynyń aldy alý sharalaryn júrgizip jatyr. Qaýipti degen aýmaqtarda jedel shtabtar qurylyp, keshendi jattyǵýlar ótkizilýde, - dep habarlaıdy QazAqparat HAA tilshisi oblystyq TJD baspasóz qyzmetine silteme jasap.
Qutqarýshylar Ordabasy jáne Tóle bı aýdandarynda sý tasqynyn boldyrmaý jáne qaýipti jaǵdaı bola qalǵanda daıyndyqtaryn pysyqtap jatyr. Buryn sý alǵan jerlerde tekserý sharalaryn uıymdastyrýda. Óńir qutqarýshylarynyń aıtýynsha, mundaı keshendi jattyǵýlar tabıǵı apat oryn ala qalǵan jaǵdaıda qolda bar tehnıka men mamandardyń jedel áreketi men múmkindigin tekserip, pysyqtaýǵa septigin tıgizedi.
«Qazirgi tańda oblys aýmaǵynda jaǵdaı qalypty, baqylaýda. Óńirdegi 41 sý qoımasynyń barlyǵy derlik óz deńgeıinde jumys istep tur. Aqpan aıynyń sońyna taman sel jáne sý tasý qaýpi bar aýmaqtardy áýeden baqylap shyǵý josparlanyp otyr. Budan bólek aýyldyq jerlerde qaýipti der kezinde eskertetin 40 dabyl qaqqysh ornatyldy», - deıdi oblystyq TJD bas mamany Z.Turysbekova.
Sala mamandary bergen málimetterge súıensek, óńirde tótenshe jaǵdaılar kezine qajet 47 evakýatsııa beketteri daıyndalyp, onda barlyq qajettiliktermen qamtamasyz etilgen. Tabıǵı apat oryn ala qalǵan jaǵdaıda TJD-nyń 1 500 jeke quramy men 85 tehnıka daıyn tur.
Al, ázirge bul aýmaqtardaǵy jaǵdaı qalypty kúıinde saqtalyp otyr. Tek, sońǵy eki kún boıy jaýǵan jańbyrdan oblys ortalyǵyndaǵy jurt ábigerge tústi. Aýlalar men kóshelerde sý tolyp, jeńil kólikterdiń júrýi qıyndaǵan. Sebebi, kósheler sýǵa tolyp, aryqtardan asyp ketti. Ony qalanyń kommýnaldyq qyzmeti sý sorǵysh tehnıkalarmen tazartýda.
