OQO kórermenderi Ózbekstan teatrynyń ónerin tamashalady
ShYMKENT. QazAqparat - Ońtústik Qazaqstan oblysy Mádenıet jáne tilderdi damytý basqarmasynyń uıymdastyrýymen 10-14 mamyr kúnderi aralyǵynda Qazaqstandaǵy Ózbekstan Respýblıkasynyń jylyna oraı Ózbek ulttyq akademııalyq drama teatrynyń óńirge gastroldik issapary bastaldy, dep habarlaıdy QazAqparat.
Oblys ákimi baspasóz qyzmetiniń habarlaýynsha, atalǵan jyl aıasynda óńirge kelgen ózbekstandyq óner ujymy Ońtústik Qazaqstan oblystyq orys drama teatrynda Erkın Hýshvaqtovtyń «Kóńil» komedııasyn sahnalady.
Qos eldiń mádenı baılanysyn nyǵaıtýǵa arnalǵan sharanyń ashylý saltanatyna Ońtústik Qazaqstan oblysy ákiminiń orynbasary Ulasbek Sádibekov qatysyp, óńir basshysynyń arnaıy quttyqtaýyn jetkizip, izgi nıetin bildirdi.
Osy oraıda, Ózbek ulttyq akademııalyq drama teatrynyń dırektory, Ózbekstanǵa eńbegi sińgen ártis, «Mehmat-Shýhrat» ordeniniń ıegeri Fathýlla Masýdov kórshi elder arasyndaǵy baılanys pen mádenı qarym-qatynastyń beriktigin sóz etti.
Sharaǵa óńirimizdegi mádenıet jáne óner mekemeleriniń basshylary men qyzmetkerleri, buqaralyq aqparat quraldary qatysty.
Erkın Hýshvaqtovtyń «Kóńil» komedııasy 12 mamyr kúni saǵat 16:00-de Saıram aýdany, Qarabulaq aýyldyq mádenıet úıinde jalǵasady, 13 mamyr kúni saǵat 16:00-de J.Shanın atyndaǵy oblystyq akademııalyq qazaq drama teatrynda gastroldiń saltanatty jabylýy ótkiziledi.
