OQO kókónis konservilerin Qytaıǵa eksporttaýda
ShYMKENT. QazAqparat - Ońtústik Qazaqstan oblysy Túlkibas aýdanyndaǵy «Baıterek 4» JShS-y jylyna 1,5 myń tonna bolatyn 28 túrli konservilengen kókónis ónimderin shyǵarýda, dep habarlaıdy QazAqparat oblys ákiminiń baspasóz qyzmetine silteme jasap.
Kásipker taýarlardyń basym bóligin Almaty qalasy men elimizdiń batys óńirlerine jiberýde. Búginde tabıǵı, ekologııalyq taza ónimderge Qytaı halqy da qyzyǵýshylyq tanyta bastaǵan.
«Kún sanap ónimizge degen suranys kúsheıip keledi. Tutynýshylardyń kóńilinen shyqqandyqtan dep oılaımyn, qazir sheteldik naryqqa aıaq basyp otyrmyz. Jazǵy ýaqytta 40 adam jumysqa tartylǵan. Al, qazir 20 adam jumys isteýde», - dedi «Báıterek 4» JShS dırektorynyń orynbasary Baqytjan Ospanov.
Óńdeletin kókónister Saıram aýdanynan bólek, Qyrǵyzstan, Ózbekstan elderinen de satyp alynýda. Kásipker aldaǵy ýaqytta shıkizatty da ózi óndirýdi qolǵa almaq. Osy jumystardy iske asyrý úshin aýdan ákimshiligimen birlesken túrde tıisti jumystar atqarylýda.
Aıta ketsek, «Baıterek 4» JShS-nyń «Kókónis konservileý bazasy 2015 jyly «Bıznestiń jol kartasy-2020» memlekettik baǵdarlamasy aıasynda iske qosylǵan. Jobanyń jalpy quny 115 mln teńge. Óndiris orny Qytaı, Reseı, jáne Bolgarııa elderinen alynǵan zamanaýı qural jabdyqtarmen jabdyqtalǵan.
