OQO əkimi Ardagerler úıindegi qarttardy Qurban aıt merekesimen quttyqtady
Oblys ákimi baspasóz qyzmetiniń habarlaýynsha, musylman jurtynyń qasıetti merekesi sanalatyn osynaý ulyq meıramda 200-ge jýyq qazynaly qartqa aıttyq dastarhan jaıyp, syı-sııapat jasady.
«Búgingi dastarhan basynda «Soǵys ardagerleri», «Eńbek ardagerleri», «Batyr analar» syndy aıryqsha qurmetke ıe aldyńǵy býyn aǵa-apalar otyr. Sizder, búkil ǵumyrlaryńyzdy elimizdiń ósip, órkendeýine - bolashaq jastarymyzdyń jaqsy jaǵdaıda jetilýine baǵyshtadyńyzdar. Sondyqtan, osyndaı emdeý-saýyqtyrý ortalyǵyna kelip, em-dom alyp turýǵa ábden laıyqtysyzdar. Munda emdelýshi eki adamǵa bir qyzmetkerden bólingen. Odan bólek, ardagerlerimiz úshin túrli emdik protsedýralardy usynǵan kabınetter jetkilikti. Elbasynyń elimizdiń áleýmettik salalary - densaýlyq saqtaý men bilim berý salalaryna aıryqsha kóńil bólip otyrǵanyn bilesizder. Demek, memleketimizdiń osyndaı qamqorlyǵy odan ármen de jalǵasyn taba beretinine senimim kámil», - dedi oblys basshysy.
OQO jumyspen qamtýdy úılestirý jáne áleýmettik baǵdarlamalar basqarmasyna baǵynysty «Ardagerler úıi» kommýnaldyq memlekettik mekemesinde búginde 175 ardager - tyl eńbekkerleri men zeınetkerler, batyr analar men múgedekter, sondaı-aq, aýǵan soǵysynyń ardagerleri emdik-saýyqtyrý sharalarynan ótýde.
Árbir on bes kúnde 200 ardagerdi qabyldaıtyn emdeý-saýyqtyrý ortalyǵynda jylyna 4 myń UOS ardagerleri men solarǵa teńestirilgender, «Halyq qaharmany» ataǵyn ıelengender, ІІІ dárejeli Eńbek dańqy ordenimen marapattalǵandar, «Altyn alqa», «Kúmis alqamen» nagradtalǵandar jáne jasyna, múgedektigine baılanysty zeınetkerler emdeledi.
