OQO əkimi 108 jastaǵy Batyr Anany quttyqtady
ASTANA. QazAqparat - 8 naýryz - Halyqaralyq áıelder merekesi qarsańynda Ońtústik Qazaqstan oblysynyń ákimi Janseıit Túımebaev Shymkent qalasynda turatyn 108 jastaǵy Batyr Ana Nazym Mambetáli ájeıdiń shańyraǵyna arnaıy bardy. Qazynaly qartty meırammen quttyqtap, ystyq lebizin bildirgen aımaq basshysy qarııaǵa syılyǵyn tabystady.
«Jer betindegi jaqsylyq ataýly analardyń úlken júregimen árlenedi desek, jylyna bir toılanatyn merekede olardyń eńbekterin baǵalap, syı-qurmet kórsetý paryzymyz. Sizder ómirdi nurlandyryp, shańyraqqa shattyq nuryn sebesizder. Sizderdiń qoldaýlaryńyz árkimniń júreginde senimdilik uıalatyp, shýaq syılaıdy. Osy aıryqsha qasıetterińiz máńgilik saltanat quryp, elge yrys-qut darysyn. Árqashan, shańyraqtaryńyzdyń berekesi bolyp, úıińizden jylylyq ketpesin. Januıańyzǵa bereke, birlik tileımin!», -degen Janseıit Qanseıituly qart anamen áńgimelesip, estelik sýretke tústi.
Eki ǵasyrdyń kýási bolǵan, zulmat jyldary aıanbaı ter tókken Nazym ájeı shańyraǵyna arnaıy quttyqtaı kelgen oblys ákimine alǵysyn bildirip, aq batasyn berdi. Jastyq shaǵyn eske alyp, aǵynan jaryldy. Ásirese, Ońtústik óńiriniń kórkeıip jatqanyna qýandy.
Oblys ortalyǵyndaǵy eń qart ana Otyrar aýdany, Sháýildir eldi mekeninde 1909 jyldyń 1 qańtarynda dúnıege kelgen. Sanaly ǵumyrynyń birneshe jyly surapyl soǵys jyldarymen tuspa-tus kelgen keıýana soǵysqa deıin kóp jyldar boıy jumysshy bolyp eńbek etip, sol jerden zeınetkerlikke shyqqan tyl ardageri.
Toǵyz ul-qyz tárbıelep ósirgen Batyr ana búgingi tańda nemeresiniń úıinde turady. Otbasy músheleri jeke kásippen aınalysady. Búginde 25 nemere, 15 shóbere súıip otyrǵan keıýananyń oıy anyq, densaýlyǵy birqalypty.
Aıta keteıik, Ońtústik Qazaqstan oblysy turǵyndarynyń 1,5 mılıonǵa jýyǵy názik jandar. Al óńirimizde 100 jastan asqan 88 qarııa ómir súrip jatyr. Uzaq jasaýshy egde azamattardyń basym kópshiligi Shymkentte, Maqtaaral men Sarayǵash aýdandarynda turady. 100 jastan asa ómir súrip jatqan qarttardyń ishinde 70-ge jýyǵy tyl eńbekkerleri.
Oblys boıynsha jyl kóleminde uzaq jasaýshy qarııalarǵa bıýdjet jáne mekemeler, demeýshiler esebinen múmkindigine qaraı bir jolǵy materıaldyq járdem men syı-sııapattar berilip keledi.
Máselen, ótken 2016 jyly 77 qarııaǵa 636,7 myń teńgeniń materıaldyq qoldaýy kórsetilip, onyń ishinde, jergilikti bıýdjet esebinen 86,9 myń teńge jáne demeýshiler esebinen 549,8 myń teńgege syılyqtar úlestirildi.
