OQO: Keler jyly eki aýdandy jalǵaıtyn jol paıdalanýǵa beriledi
ASTANA. QazAqparat - Maqtaral men Shardara aýdanyn jalǵap jatqan jol 2017 jyly paıdalanýǵa beriledi. Qazir qurylys jumystarynyń 85 paıyzy aıaqtaldy. Bul týraly qurylys alańyna baryp, jergilikti turǵyndarmen kezdesken Aýyl sharýashylyǵy mınıstrligi sý resýrstary komıtetiniń tóraǵasy Islam Ábishev málimdedi.
Qos aýdannyń arasyn jalǵaýy tıis sý bógetiniń uzyndyǵy - 37 shaqyrym. Qurylys jumystaryna 1500-ge jýyq jergilikti turǵyn tartylǵan. Táýlik boıy 700 arnaıy tehnıka jumys isteýde. Joldyń jalpy quny - 16 mlrd teńge.
Merdiger mekeme búıregi buryp, tek otandyq ónimdi jaratqan. Sonyń esebinen 3 mlrd. teńge únemdepti. Buǵan deıin Maqtaral aýdanyndaǵy aǵaıyn Shardaraǵa Saryaǵash aýdany arqyly qatynaıtyn. QR AShM Sý komıtetiniń tapsyrysymen salynyp jatqan jol qurylysy bitse, qos aýdannyń arasy jaqyndaıdy. 2013 jyly bastalǵan is 2017 jyly maýsym-shilde aılarynda bitedi,-deıdi mamandar.
Syrdarııa - Orta Azııadaǵy eń iri ózenderdiń biri. Ferǵana dalasynan Aral teńizine deıin aǵyp ótedi. 1960 jyly ózen boıynan, Qazaqstan men Ózbekstan shekarasy tusynda Shardara sý qoımasy salynǵan. Strategııalyq mańyzy zor joba keleshekte elimizdiń sý resýrsyna degen qajettiligin de jónge keltiretin bolady.
