OQO: Qazyǵurtta kóppáterli 4 turǵyn úı paıdalanýǵa beriledi
ShYMKENT. QazAqparat - Ońtústik Qazaqstan oblysyndaǵy Qazyǵurt aýdanynda 16 páterli 4 turǵyn úı bıyl paıdalanýǵa beriledi. Bul týraly búgin óńirlik kommýnıkatsııalar qyzmetinde ótken brıfıngte atalmysh aýdan ákimi Tólegen Telǵaraev málim etti, dep habarlaıdy QazAqparat tilshisi.
«Nurly jer» baǵdarlamasy aıasynda salynatyn bul baspanalar aýdandaǵy «Bolashaq» móltek aýdanynan boı kótermek.
Tólegen Turtaıulynyń sózinshe, jergilikti bıýdjet esebinen Atbulaq eldi mekeninde 17 páterli qyzmettik turǵyn úıdiń qurylysy júrgiziletin bolady. Al 64 eldi mekenniń qazirgi tańda 56,3 paıyzy tabıǵı gazǵa qosylǵan. Búginde qurylysy aıaqtalǵan 9 eldi mekenge tabıǵı gaz qosý jumystary júrgizilýde. Budan bólek bıyl aýdan boıynsha 45 eldi meken tabıǵı gaz júıesimen qamtylyp, kórsetkish 70,3 paıyzdy quraıtyn bolady.
Sonymen qatar ótken jyly aýdandaǵy ónim kólemi 7,6 paıyzǵa artyp, kásipkerler 97,9 mlrd teńge tabys tapqan. 30 shaǵyn joba iske qosylyp, 253 adam turaqty jumyspen qamtylypty.
«2018 jyly jalpy quny 1 089,2 mln teńgeni quraıtyn 32 shaǵyn jobany júzege asyrý josparlanyp otyr. Ústimizdegi jyldyń úsh aıynyń ózinde 8 shaǵyn joba iske asyrylyp, 124 adam jumysqa turǵan. Bıyl aýdanda 2 shaǵyn óndiris ornyn iske asyrý josparlanǵan. Atap aıtqanda, «Qazyǵurt aına» JShS-nyń «Suıyq shyny shyǵarý» tsehy men «Unifrutti gold» JShS-nyń «Jemister men kókónisterdi óńdeý arqyly dıetalyq pıýreler shyǵarý» jobalary», - dedi Tólegen Telǵaraev
Elbasynyń «Bıznestiń jol kartasy 2020» baǵdarlamasy aıasynda aýdan kóleminde 16 ónerkásip ashylǵan.
«Aýdannyń 2016-2020 jyldarǵa arnalǵan áleýmettik-ekonomıkalyq damý baǵdarlamasyna sáıkes, bıyl ónim kólemin 6 473,3 mln teńgege jetkizý mejelenip otyr. Sondaı-aq, esepti jyldyń qorytyndysy boıynsha aýdandaǵy aýyl sharýashylyǵynyń jalpy ónim kólemi 31 641,8 mln teńgege jetip, naqty kólem ındeksi 101 paıyzdy quraǵan. Aýdandaǵy 330 usaq sharýa qojalyǵy 21 kooperatıvke biriktirildi», - dedi Tólegen Turtaıuly.
Aýdan ákimi sondaı-aq «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan» baǵdarlamasy aıasynda aǵymdaǵy jyldyń úsh aıynda 1 202 turǵyn baǵdarlamaǵa qatysyp, jyldyq jospar 30 paıyzǵa oryndalǵanyn atap ótti.
