OQO kásiporyndary EKSPO-da qoıylǵan 105 ozyq tehnologııany engizýge qyzyǵýshylyq tanytty
Bul týraly óńir basshysy Janseıit Túımebaev halyqaralyq mamandandyrylǵan kórmesinde usynylǵan jańa tehnologııalardy óńirde qoldaný máseleleri boıynsha ótken jıynda málim etti, dep habarlaıdy OQO ákiminiń baspasóz qyzmeti.
Ákimniń aıtýynsha, qazirgi ýaqytta kásiporyndarda ozyq tehnologııalar qarastyrylǵan 27 jobany engizý boıynsha jumystar júrgizilýde. Máselen, «Shymkentmaı» AQ katalıtıkalyq deaerotsıondyq qondyrǵyny óndiris protsesinde paıdalanbaq. Al Chehııa, Reseı elderiniń qaldyqtardy óńdeý boıynsha «HEDVIGA GROUP» jáne «WiseSoiL» kompanııalardyń jobalaryn «Tehnologııa-21» jáne «Taza qala» JShS-teri qaldyqtardy óńdeý zaýytynyń óndiris jumystaryna engizbek. Sonymen qatar, «Jınalǵan sýdy tazartýǵa arnalǵan mobıldi kompleks» jáne «Kún batareıalaryn basqarý júıesi» jobalaryn «Sý resýrstar-Marketıng» JShS qoldanysqa engizetin bolsa, Malaızııa memleketiniń kóshe jaryqtandyrýǵa «Q-RAU tm» jaryq dıodty lampylaryn «Aqsemserstroıservıs» kásiporny Shymkent qalasyndaǵy kóshelerdi jaryqtandyrýǵa paıdalanýdy qarastyrýda. Budan bólek, EKSPO halyqaralyq kórme taqyryby boıynsha óńirde ónerkásip, ekologııa, aýyl sharýashylyǵy salasynda da jańa tehnologııalardy engizý boıynsha birqatar jumystar atqarylyp jatyr.
«Búgingi tańda oblysymyzda Elbasynyń «Jasyl ekonomıkaǵa» kóshý jónindegi tujyrymdamasyn iske asyrýǵa baǵyttalǵan aýqymdy jumystar jasalýda. Qazirgi kúnge óńirde 5 jańartylǵan energııa kózderi nysandary jumys istep tur. Olar jalpy qýaty 5,8 MVt bolatyn 3 shaǵyn sý elektr stantsııasy, al osy jyly qosymsha jalpy qýaty 3,5 MVt bolatyn 2 shaǵyn sý elektr stantsııasyn iske qosylatyn bolady. Júrgizilgen zertteýler negizinde, aldaǵy jyldary oblystaǵy 122 ózenderde jalpy qýaty 420 MVt-ty quraıtyn shaǵyn sý elektr stantsııalaryn salý josparlanyp otyr. Qazirdiń ózinde Ógem ózeninde jalpy qýaty 57 MVt bolatyn kaskadty shaǵyn sý elektr stantsııalaryn salý jóninde Túrkııanyń «DOGUS» Constraction kompanııasymen kelissózder júrgizilýde», - dedi J.Túımebaev.
Elordamyz Astanada ótken «EKSPO - 2017» halyqaralyq mamandandyrylǵan kórme sátti ótkenin aıtqan aımaq basshysy, álemniń nazarynda bolǵan tarıhı sharany 151 myńnan astam ońtústikqazaqstandyq baryp tamashalaǵanyn atap ótti.
