OQO kásipkerleri sheberlik sabaǵyn ótkizdi
ShYMKENT. QazAqparat - Ońtústik Qazaqstan oblysynyń «Qazaqstan halqy Assambleıasy» ǵımaratynda birqatar bıznesmender bolashaq kásipkerler úshin sheberlik sabaǵyn ótkizdi. Oblystyq «Qoǵamdyq kelisim» KMM uıymdastyrǵan sharaǵa aýdan-qalalardaǵy kásipkerlikpen aınalysýǵa nıetti azamattar men kásiptik mamandyqty ıgerip jatqan stýdent jastar qatysty, dep habarlaıdy QazAqparat tilshisi.
Erkin formatta ótken basqosýda kásipkerler óz tájirıbelerimen bólisip, tabysqa jetýdiń joldaryn aıtty. Aýyl sharýashylyǵymen aınalysýǵa qolaıly aımaqta ornalasqanyn aıtqan "Amangeldi" JShS-nyń dırektory Nurlan Quralov bul salanyń bolashaǵy zor ekendigine naqty mysaldar keltirdi. Al «Altyn Adam» otandyq kıimder brendiniń negizin qalaýshy Baljan Qalmuratova jastardy búginnen kásipkerlikke beıimdelýge shaqyryp, bul baǵytta tájirıbe almasýǵa árqashan daıyn ekenin aıtty. Eýropalyq sapada ónim shyǵaratyn «Bella Mebel» jıhaz zaýyty jaqynda «Bıznestiń jol kartasy - 2020» baǵdarlamasy aıasynda Saıram aýdanynda ashylǵan. Jylyna 4 myń jıyntyq jıhaz shyǵarýǵa qaýqarly fabrıkanyń ókili kásipkerlerge memleket tarapyna kórsetilip jatqan qoldaýlarǵa keńinen toqtaldy.
Aıta ketý kerek, oblystyq Assambleıa óńirdegi etnomádenı birlestiktermen birge tek kópshilik mádenı is-sharalar ótkizýmen shektelmeı, týǵan jerdiń ekonomıkasyn damytýǵa da úles qosyp keledi. Óńirdiń áleýmettik-ekonomıkalyq damýyna etnomádenı birlestikter tarapynan laıyqty úles qosý, belgili bir kásipke mamandanǵan QHA músheleriniń úzdik is-tájirıbelerin ózgelerge úıretý arqyly turǵyndar arasynda kásipkerliktiń óris alýyna jaǵdaı jasaý baǵytynda jyl basynan beri birqatar is-sharalar uıymdastyryldy. 
