OQO kásipkerleri Atyraýda alma ósirýge nıetti
ATYRAÝ. QazAqparat - Ońtústik Qazaqstan oblysynyń kásipkerleri Atyraýda alma ósirýge nıetti, dep habarlaıdy QazAqparat Atyraý oblystyq óńirlik kommýnıkatsııalar qyzmetine silteme jasap.
Kásipkerler Atyraý oblysyna turǵyndar pikirin bilý maqsatynda ónimniń alǵashqy bóligin ákeldi. Ońtústik Qazaqstan oblysynda ósirilgen 18 tonna almanyń alǵashqy toptamasy «Saraıshyq» bazaryna 20 qańtarda saýdaǵa shyǵaryldy. Jetkizýshiler qalalyq ákimdikpen kelisimshartqa otyryp, jemisterge naryq qunynan tómen baǵa bekitken.
«DALA-FRUIT» kompanııasynyń basshylyǵy turǵyndardyń otandyq aýyl sharýashylyǵy ónimderine degen suranysy men qyzyǵýshylyǵyn arttyrý maqsatynda qalalyq ákimdikke ótinish bildirdi. Qazir Atyraýǵa birinshi surypty almanyń úsh túri ákelindi, olar bazar naryǵynan 15-20 paıyzǵa arzanǵa satylady», - deıdi qalalyq kásipkerlik jáne týrızm bóliminiń basshysy Rýslan Dáýletov.
Kommýnaldyq bazarda ońtústikten kelgen almalardyń bir kılogramy 230 teńgeden satylýda. Negizi almanyń ortasha baǵasy - 400 teńge. Satylymnyń alǵashqy kúninen bastap turǵyndardyń otandyq ónimge degen suranysy joǵary ekeni baıqaldy. Jarty kúnniń ishinde bir tonnaǵa jýyq alma satylǵan.
Eger ónimniń sapasy men baǵasy turǵyndardyń kóńilinen shyqsa Atyraýda alǵashqy alma baǵy bolýy ábden múmkin. Kompanııa ókilderi almany Atyraýda da ósirýge nıetti. Oblystyq ákimdik habarlaǵandaı, kásipkerlerge memlekettik qoldaý sharalary kórsetiledi.
Foto: atr.kz
