OQO iskerlik klımatty qalyptastyrýda úzdik úshtikke kirdi
ASTANA. QazAqparat - Ońtústik Qazaqstan oblysy iskerlik klımatty qalyptastyrýda respýblıka boıynsha úzdik úshtikte. Astana qalasynan keıin úshinshi orynǵa turaqtaǵan óńirdiń shaǵyn jáne orta bıznesti damytýdaǵy qarqyny joǵary.
Búgin ońtústikqazaqstandyqtarǵa Qazaqstannyń kásipkerler quqyǵyn qorǵaý boıynsha ókili Bolat Palymbetov osyndaı baǵa berdi. Oblys ákimi Janseıit Túımebaevtyń qatysýymen ótken kezdesýde kásipkerlik salasyndaǵy ózge de ózekti máseleler talqylanyp, aldaǵy joba-josparlar qaraldy, dep habarlaıdy QazAqparat HAA tilshisi.
Kezdesýde aımaq basshysy Janseıit Túımebaev ońtústik óńiriniń kásipkerlik salasynda jıi kóteriletin problemalyq suraqtar týyndap jatatynyna toqtaldy. Atap aıtqanda, óńirdiń iskerlik klımatyn qalyptastyrý, kóleńkeli ekonomıka men sybaılas jemqorlyqqa qarsy kúres, salyq tóleý, jer telimderiniń berilýi sııaqty ózekti máseleler jóninde sóz qozǵaldy. Respýblıka boıynsha "Atameken"kásipkerler palatasyna shaǵyn, orta jáne iri bızneske qatysty túsken aryz-shaǵymdardyń basym bóligi de osy máseleler jóninde tirkeledi. Óńir basshysy aımaqta kásipkerlikke qajetti jer telimderine degen tapshylyqtýyndap otyrǵanyn jetkizdi.
«Ońtústik Qazaqstan oblysynda bos jatqan birde bir jer telimi joq. Oblys ortalyǵyndaǵy barlyq kommertsııalyq jerlerdiń satylyp ketkenin jasyrýǵa bolmas. Sondyqtan biz qurylysy uzaq jyldar boıy toqtap turǵan jer telimderin anyqtap shyǵyp, qadaǵalaýymyz qajet. Bul rette aýdan-qalalardaǵy barlyq jer telimderi tekserýden ótip, olardyń tıimdiligin arttyrý joldaryn oılastyrǵan abzal», - dedi Janseıit Qanseıituly.
Qazaqstannyń kásipkerler quqyǵyn qorǵaý boıynsha ókili Bolat Palymbetovtiń aıtýynsha, kúngeılik kásipkerlerdiń belsendiligi joǵary. Desek te, ol birqatar túıtkilderdiń túıini tarqatylmaı otyrǵanyn atap ketti.
«Ońtústik Qazaqstan oblysy kásipkerlik nysandary boıynsha respýblıkamyzda aldyńǵy úshtikke kiredi. Mundaǵy kásipkerlerdiń belsendiligi de jyl sanap artyp keledi. Bul rette jergilikti kásip ıelerine qoldaý bildirip otyrǵan jergilikti bıliktiń de jumysyna oń baǵa berýge bolady», dedi Bolat Palymbetov.
Basqosýda sondaı-aq, ınvestorlar tartýdaǵy kóshki-qon zańnamalarynyń birqatar zańdylyqtary men memlekettik tapsyrysty bólý kezinde týyndaıtyn qujatbastylyq máseleleri de nazardan tys qalǵan joq.
