OQO ishki saıasat basqarmasynyń basshysy eki aıǵa qamaldy
ShYMKENT. QazAqparat - Ońtústik Qazaqstan oblysynda para alý kezinde ustalǵan ishki saıasat basqarmasynyń basshysy eki aıǵa tergeý abaqtysyna qamaldy. Bul týraly Shymkent qalalyq Abaı aýdandyq sotynyń sýdıasy Serjan Aınabekov málimdedi, dep habarlaıdy QazAqparat tilshisi.
Sýdıanyń sózinshe, basqarma basshysynyń ústinen Qylmystyq kodekstiń 366 «Para alý» babymen is qozǵalǵan.
«Shymkent qalasynyń turǵyny 1980 jyly týǵan Bolatbek Tólegenov laýazym ıesi bola tura Abaı aýdanynyń aýmaǵynda júrgizýshisi arqyly 600 myń teńge paramen ustalǵan. Tergeý organdary osyndaı aıyp taǵyp otyr. Shymkent qalasy Abaı aýdandyq soty atalǵan azamatty eki aı merzimge kúzetpen ustaý bultartpaý sharasyna sanktsııa berdi», - dedi sýdıa Serjan Aınabekov.
Esterińizge sala keteıik, ótken aptada OQO Sybaılas jemqorlyqqa qarsy is-qımyl Ulttyq bıýrosy departamentiniń qyzmetkerleri oblystyq ishki saıasat basqarmasynyń basshysy qyzmetin atqaryp júrgen Bolatbek Tólegen men júrgizýshisi ustalǵan bolatyn. Basqarma basshysy 2 mln 100 myń teńge para almaq bolǵan dep aıyptalǵan edi. Qazirgi tańda osy iske qatysty tergeý amaldary júrgizilýde.
