OQO ǵalymdary latyn álipbıine kóshý ádistemesin jasaýǵa qatysady

ShYMKENT. QazAqparat - Ońtústik Qazaqstan oblysynda bir top ǵalym, professor, ustazdar jáne qoǵam belsendileri bas qosyp, latyn grafıkasyn qoldanysqa engizý máselesin keńinen talqylady. Ońtústik Qazaqstan memlekettik pedagogıkalyq ınstıtýtynda jınalǵan zııaly qaýym ókilderi keshe ǵana Aqordada usynylǵan jańa latyn álipbıiniń úlgisin biraýyzdan qoldap otyr, dep habarlaıdy QazAqparat tilshisi.

Kezdesý barysynda jınalǵandar Túrkııa, Ázerbaıjan, Ózbekstan - úsh túrkitildes memlekettiń tájirıbesinen mysaldar keltirip, olardyń jetistikteri men kemshin tustaryn sóz etti. Basqosýda atalǵan ınstıtýt prorektorynyń mindetin atqarýshy Erkin Mahashev qazaq tiliniń ulttyq erekshelikterin saqtaý boıynsha izdenis jumystary júrgizilip jatqanyna toqtaldy.

«Ǵalymdar latyn álipbıine kóshýdiń ádistemesin jazyp jatyr. Bul jerde jastardyń da úlesi zor. Latyn áripterin saýatty qoldaný úshin tııanaqtylyq  kerek. Sebebi qazaqsha jazýdy joǵaltpaı, ulttyq kodty saqtaýymyz qajet», - dedi Erkin Mahashev.

Ǵalymdar aldaǵy ýaqytta jaryq kóretin til mamandarynyń ádis-tásilder jıyntyǵy balabaqsha jáne bastaýysh synyp balalaryna arnalatynyn tilge tıek etti. «Latyn álipbıi - tyń tehnologııalardyń tili» degen óńir ǵalymdary álipbı nusqasyna qoldaý bildirdi.