OQO-ǵa tartylǵan ınvestıtsııa kólemi 482 mlrd teńgeni qurady
ShYMKENT. QazAqparat - Ońtústik Qazaqstan oblysynda 2017 jyldyń qorytyndysy boıynsha ınvestıtsııa kólemi 482 mlrd teńgeni qurap, 2016 jylmen salystyrǵanda 20,2 paıyzǵa artty.
Bul kórsetkishpen oblys respýblıkada kósh bastap tur, dep habarlaıdy óńir basshysynyń baspasóz qyzmeti.
Bul týraly oblystyq Óńirlik kommýnıkatsııalar qyzmetinde ótken brıfıngte Ońtústik Qazaqstan oblysy ekonomıka jáne bıýdjettik josparlaý basqarmasynyń basshysy Arman Sábıtov málim etti.
Sondaı-aq, ónerkásip óniminiń kólemi 858,5 mlrd teńgege jetip, 2016 jylmen salystyrǵanda 102,1 paıyzdy quraǵan. Ońtústik Qazaqstan oblysynda ındýstrııalandyrý, ekonomıkany ártaraptandyrý jáne óndiristi damytýǵa úlken nazar aýdarylýda.
«2017 jyly óńirimizde Indýstrııalandyrý kartasy aıasynda 18 joba júzege asyrylyp, 36,5 mlrd teńge ınvestıtsııa baǵyttaldy. 2017 jyly jumys istep turǵan shaǵyn jáne orta kásipkerlik sýbektileriniń sany 180 myńǵa jýyqtap, oblys respýblıka kóleminde aldyńǵy oryndy ıelendi», - dedi Arman Sábıtuly.
Budan ózge, «Bıznestiń jol kartasy - 2020» memlekettik baǵdarlamasy aıasynda 2017 jyly 285 joba iske asyrylyp, 2 032 jumys orny ashylǵan.
Basqarma basshysynyń aıtýynsha, 2017 jyly 93 myńnan astam adam «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasymen» qamtylyp, jospar 44,8 paıyzǵa artyǵymen oryndalypty. Sondaı-aq, ótken jyly 83 myńǵa jýyq jańa jumys orny ashylǵan.
