OQO-ǵa Ózbekstan Respýblıkasy Joǵarǵy sotynyń tóraǵasy keldi
ShYMKENT. QazAqparat - Búgin Ońtústik Qazaqstan oblysyna Ózbekstan Respýblıkasy Joǵarǵy sotynyń tóraǵasy Kazımjon Kamılov keldi. Jumys sapary barysynda kórshi eldiń soty Oblystyq qylmystyq ister jónindegi mamandandyrylǵan aýdanaralyq sotynyń ǵımaratyn aralap kórdi, dep habarlaıdy QazAqparat HAA tilshisi.
Elimizdiń Joǵarǵy soty departamentiniń basshysy Nurserik Sháripov kórshi eldiń bas sýdıasyna elimizde «Ult jospary-100 naqty qadam» aıasynda sot reformalary tabysty iske asyp otyrǵanyn atap ótti. Sondaı-aq, sýdıalardyń jetinshi sezinde qoıylǵan tapsyrmalardy oryndaý boıynsha belsendi jumys júrgizilip jatqanyn atap ótti.
Qujattardy qabyldaý men protsessýaldyq suraqtardy durys túsindirý, sot otyrystaryn saýatty júrgizý men shyǵarylǵan sheshimderdi ýaqytyly berý máselesi júıeli jolǵa qoıylǵanyn jetkizdi.
Búgingi tańda atalǵan sot ǵımaratynyń barlyq sot zaly aýdıo jáne beıne tirkeýdiń avtomattandyrylǵan júıesimen jabdyqtalǵan. Atalǵan sottyń aýyr, asa aýyr qylmystar boıynsha ister qaraıtynyn, kóptegen qylmystyq isterde alqa bılerdiń sheshimi de nazarǵa alynatyny aıtyldy.
Munda sottalýshylardyń ispen tanysý bólmesi, prokýror jáne advokattar úshin arnaıy kabınet, alqabıler jınalatyn zal, kútý zaldary, sonymen qatar, sýdıalar úshin psıhologııalyq demalý kabınetteri ashylǵan. Sot jumysymen jiti tanysqan Kazımjon Fozıluly Qazaqstandaǵy sot júıesine engizilgen ozyq tájirıbeler eki el arasyndaǵy baılanysty nyǵaıtýǵa yqpal etetinin atap ketti.
