OQO-ǵa kelgen bir top zııaly qaýym ókilderi Elbasy maqalasyn tanystyrdy
ShYMKENT. QazAqparat - Elbasynyń «Bolashaqqa baǵdar: rýhanı jańǵyrý» atty baǵdarlamalyq maqalasynyń mańyzyn qalyń buqaraǵa jetkizip, keń kólemde nasıhattaý maqsatynda Elordadan ońtústik óńirine bir top zııaly qaýym ókilderi keldi. Esimi el jadynda jattalǵan rýhanııat maıdanynyń sardarlary qazaqqa etekten tartatyn eski daǵdylarmen kúresý kerektigin aıtty, dep habarlaıdy QazAqparat HAA tilshisi.
Kezdesýge jazýshy, jýrnalıst, Qazaqstannyń eńbek sińirgen qyzmetkeri «Tań-Sholpan» ádebı-kórkem, kópshilik jýrnalynyń bas redaktory Mereke Kulkenov, aqyn, Halyqararalyq «Alash» syılyǵynyń jáne QR Memlekettik syılyǵynyń laýreaty, «Qurmet» ordeniniń ıegeri, «Jazýshy» baspasynyń dırektory Esenǵalı Raýshanov, jazýshy, jýrnalıst, Qazaqstannyń eńbek sińirgen qyzmetkeri, «Tarlan-Úmit» syılyǵynyń ıegeri, balalar men jasóspirimder basylymdarynyń «Jas órken» JShS bas dırektory Júsipbek Qorǵasbek, aqyn, jýrnalıst Qazaqstan Respýblıkasynyń «Mádenıet qaıratkeri», «Aqıqat» Ulttyq qoǵamdyq-saıası jýrnalynyń bas redaktory Amanhan Álimuly syndy qalamgerler qatysty.
Qazaq eline tanymal aqyn-jazýshylar kezdesý barysynda keleshekte ultymyz tabysty bolýy úshin árbir qazaqstandyq básekege qabiletti, sana-sezimi joǵary, bilimdi, saýatty bolýy tıis ekenine toqtaldy. ıAǵnı, Qazaqstan buǵan deıingi júrip ótken jolynda ekonomıkalyq ahýalǵa mán berip keldi. Baǵyty aıqyn baǵdarlamalardyń arqasynda memleket aıaqtan nyq turdy. Turmys jaqsaryp, áleýet áldendi. Endigi maqsat - rýhanı jańǵyrý. Sananyń ashyqtyǵy álemmen bite qaınasqan ortany qalyptastyrýǵa yqpal etedi, - deıdi zııaly qaýym ókilderi.
«Elbasymyz Nursultan Nazarbaevtyń siz ben biz talqylap otyrǵan maqalasy bizdiń búgingi shyǵarmashylyq qaýymnyń arasynda silkinis, rezonans týǵyzdy. Memleket basshysynyń Astanany Almatydan Arqaǵa kóshirýi ulttyń tarıhynda qandaı mańyzǵa ıe bolsa, men oılaımyn myna búgingi maqalanyń da mańyzdylyǵy da sondaı bıik, sondaı tereń. Muny irıne kóńil kózimen barlap, zerdelep oqyǵan adamǵa kóp nárseler ashylaǵ aıqyndala túsedi jáne baǵyt-baǵdar berip otyrady. Meniń oıymsha myna maqala bul ulttyq baǵdarlama», - dedi belgili aqyn Esenǵalı Raýshanov.
Aqyn Esenǵalı Raýshanov óz oıyn osylaı juptap, bul maqalanyń júgin astanany Alataýdyń eteginen Saryarqanyń tórine kóshirgen tarıhı oqıǵanyń mánine teńedi.
Al, aqyn Amanhan Álimuly bul maqala Elbasynyń burynǵy Joldaýlarynan maǵan ystyǵyraq dedi. Óıtkeni, buǵan deıin turalaǵan ekonomıkany qalpyna keltirý úshin rýhanııatty keıinge ysyryp keldik. «Ekonomıka-óńesh. Óńeshten ótkenniń bári - ekonomıka» dep ótkendi bir túıregen aqyn Elbasy maqalasyndaǵy «Sapanyń ashyqtyǵy» bólimine aıyryqsha toqtaldy. Elbasynyń «eger Qazaqstandyqtar jer júzine úıden shyqpaı, terezeden telmirip baǵa beretin bolsa, álemde qandaı daýyl soǵyp jatqanyn kóre almaıdy» degen sózin mysalǵa keltirgen Amanhan aqyn qazaqtyń óz qazanynda ǵana qaınaýy eshqandaı jaqsylyq ákelmeıtindigin qadap aıtty. Áıgili «Jibek joly» saýda kerýeni álemmen baılanys kózi boldy. Sol sııaqty álem ádebıeti, mádenıet, órkenıet ıgilikterinen syrtqary qalýǵa bolmaıdy.
«Buryn Elbasymyz ekonomıkaǵa qatty kóńil bóletin. Tik turyp keteıik, qarnymyz toq bolsyn dep. Endi Memleket basshysy tek qana ekonomıka emes, rýhanı jańǵyrýymyzǵa bet burýymyz kerek dep otyr. Maǵan qatty unaǵan jeri, "Sana ashyqtyǵy" degen taraýy bar. Sonda Elbasymyz "bir terezeden álemge qarap otyra bermeýimiz kerek, onda biz jan-jaǵymyzdy kórmeımiz. Al, bizge búkil álemdi kórý kerek" deıdi. Shyndyǵynda bizge óz qazanymyzda ózimiz qaınap otyra bermeý kerek. Ony ýaqyt ta kótermeıdi, sosyn bizdiń ulttyq ósýimiz ben ónýimiz de kótermeýi tıis»,-dedi Amanhan Álimuly.
Birqatar jaqsy paıymdaýlarymen bólisken aqyn qazaqty etekten tartqan eski sarqynshaqtardan eń aldymen Ońtústiktiń tazarýy kerektigin sóz etti. Aqyn oıynsha, Ońtústik-qazaq ultynyń uıytqysy, qazaq ordasy. Igilikter osy jerden bastalýy zańdy.
Óz kezeginde jazýshy Júsipbek Qorǵasbek te áriptesteriniń rýhanıat jónindegi oılaryn jalǵady, keleli usynystar aıtty. Oqyrmandarmen oıly kezdesýdi Qazaqstan halqy Assambleıasynyń Ońtústik Qazaqstan oblystyq fılıaly tóraǵasynyń orynbasary Muratəli Qalmuradov qorytty.
