OQO-ǵa arnaıy saparmen kelgen BQO delegatsııasy aımaqtaǵy zaýyttardy aralady
ShYMKENT. QazAqparat - Ońtústik óńirge arnaıy saparmen kelgen batysqazaqstandyq delegatsııa búgin ońtústiktegi zaýyttardy aralap kórdi. Shymkenttik kásiporyndardyń jumys barysymen tanysqan olar ekijaqty ózara kelisimge keldi, dep habarlaıdy QazAqparat HAA tilshisi.
Batystan kelgen kásipkerler aldymen «Evrokrıstal» seriktestigin baryp kórdi. Biregeı óndiris orny jylyna 60 mln shyny quty shyǵarady. Ońtústikte bul seriktestikpen básekelese alatyn uıym joq. Zaýyt ázirge qazaqstandyq suranystyń tek 20 paıyzyn jabýǵa qaýqarly.
«Otandyq tutynýshylardyń suranysyn budan bólek, almatylyqtar qanaǵattandyryp otyr. Ondaǵy kásiporyn qajettiliktiń tek 30 paıyzyn qamtıdy. Al, qalǵan 50 paıyz ónim shetelden tasymaldanady. Importtyq ónimder bizdikine qaraǵanda qymbatyraq. Sol sebepti osyndaı ujymdar arqyly otandyq ónim kólemin ulǵaıtýdy kózdep otyrmyz»,- deıdi seriktestik basshysy Rýstam Sýhov.
Tabıǵı gaz óndirýde kósh bastap turǵan batysqazaqstandyqtar Shymkenttiń motor maıyn shyǵaratyn zaýytyna da bas suqty. 135 adam jumyspen qamtylǵan seriktestik óniminiń 99 paıyzyn ishki naryqqa joldaýda. Budan bólek, oblystyń toqyma klasteri de damyp keledi. Arnaıy delegatsııa oǵan «Álem BT» shulyq toqý fabrıkasyna kelgende kóz jetkizdi. Jeńil ónerkásip kesheniniń óndirisinde toqtaý joq. Ozat kásiporyn tájirıbesin batysqazaqstandyq delegatsııa da úlgi etýge ázir.
Jalpy, Batys Qazaqstanmen áriptestik baılanys ońtústik ónimderiniń Reseı men batys elderine eksporttalýyna jol ashpaq. Máselen, kúngeılik tsement pen transformator endi Oral arqyly Eýropa naryǵyna saýdaǵa shyǵarylatyn boldy.
