OQO eńbek, áleýmettik qorǵaý jáne kóshi-qon departamentiniń basshysy múgedekterden para bopsalaǵan
ASTANA. QazAqparat - Ońtústik Qazaqstan oblystyq eńbek, áleýmettik qorǵaý jáne kóshi-qon departamentiniń basshysy tutqyndaldy. Bul týraly QR Sybaılas jemqorlyqqa qarsy is-qımyl ulttyq bıýrosy baspasóz qyzmetinen habarlady.
Taratylǵan aqparatqa sáıkes, vedomstvonyń Ońtústik Qazaqstan oblystyq departamentiniń qyzmetkerleri OQO eńbek, áleýmettik qorǵaý jáne kóshi-qon departamentiniń basshysy B.Syzdyqovty tutqyndady. B.Syzdyqovtyń aýdandyq bólimderdiń basshylarymen kelisimge kelip, múgedektigin alǵysy keletin nemese ony uzartýdy qalaǵan eńbekke jaramsyz azamattardan aqsha alyp otyrǵandyǵy anyqtalǵan.
«Máselen, B.Syzdyqov jeke tulǵadan onyń múgedektigin merzimsiz uzartyp berý úshin 100 myń teńge somasynda para alýy barysynda jemqorlyqqa qarsy qyzmettiń qolyna tústi», - delingen habarlamada.
Kúdikti qazirgi ýaqytta Shymkent qalalyq ІІB ýaqytsha oqshaýlaǵyshyna qamaldy. Sotqa deıingi tergeý amaldary júrgizilýde.
