OQO eksportqa jańa taýar túrlerin shyǵarýdy qolǵa aldy

ShYMKENT. QazAqparat - Ońtústik Qazaqstan oblysynyń kásipkerleri eksportqa jańa taýar túrlerin shyǵarýdy qolǵa aldy. Jyl basynan beri oblys kásiporyndarynyń eksportqa shyǵarǵan ónimderiniń quny 700 mln AQSh dollaryna jetken. Bul týraly óńirdiń kásipkerlik basqarmasynyń basshylyǵy málimdedi, dep habarlaıdy QazAqparat tilshisi.

Osyǵan deıin ońtústik óńirinen eksportqa shyǵatyn taýarlar tek azyq-túlik, maqta-mata jáne aýylsharýashylyq ónimderi ǵana bolsa, endigi jerde zamanaýı tehnologııa qoldanyp óndiriletin ónim túrleri de kóbeıip otyr.

Bul tizimdi endi  ortopedııalyq qural-jabdyqtar, kilemder men jańasha jasalǵan plıtalar tolyqtyrýda. Dál qazir Reseı, Tájikstan, Qyrǵyzstan jáne Eýropa elderine eksportty ulǵaıtý máselesi qaralyp otyr. Máselen, Shymkentten shyǵarylatyn vakýýmdyq tútiksheler Eýropada saýdalanady. Bul qazir óńirge birshama jańa eksporttyq taýar túri bolyp otyr. Sala mamandarynyń sózinshe, eksportqa ónim shyǵarýdy óristetýde memlekettik qoldaýdyń naqty kómegi kóp. Qazirgi tańda kásipkerlerge «Eksport shyǵarýshy-2020» baǵdarlamasyna qatysý usynylyp,  ózge de eksportty qoldaý men óristetýge baǵyttalǵan baǵdarlamalar jasalyp otyr.

«Eger óndiris orny jańashyldyq tásilmen ónim óndirip, ol ónim eksportqa shyǵatyn bolsa, biz ákimdik tarapynan barlyq jaǵdaı jasaýǵa daıynbyz. Sol úshin de bizde arnaıy ekonomıkalyq aımaq bar. Ol jerde óndirilgen ónimder barlyq salyq túrinen bosatylǵandyqtan, bastapqy baǵa tómen bolyp, eksportqa tıimdi baǵada saýdalaýǵa múmkindik týady», - deıdi oblystyq ónerkásip basqarmasynyń bóliminiń basshysy Hıkmat Raıymbekov.