OQO «Dıplommen aýylǵa» baǵdarlamasyn júzege asyrýda Respýblıkada kósh bastap tur
Bul týraly OQO óńirlik kommýnıkatsııalar qyzmetinde ótken brıfıngte oblystyq otbasy, balalar men jastar isteri jónindegi basqarmasynyń basshysy Balmarjan Narbekova málim etti, dep habarlaıdy QazAqparat tilshisi.
Basqarma basshysynyń sózinshe, ótken jyly óńirde 33 myńnan astam jas jumysqa ornalassa, onyń ishinde 18,2 myńy aýyl jastary bolyp tabylady. Sondaı-aq, byltyr 216 jasqa turǵyn úı berilgen.
«Búgingi tańda oblysta 750 myńnan astam jas bar, bul óńir halqynyń 26 paıyzy. Qazir aımaqta jastarǵa arnalǵan 57 qoǵamdyq birlestik, 7 respýblıkalyq jastar uıymdarynyń fılıaldary men 20 etnomádenı ortalyqtyń janynan jastar qanattary jumys istep keledi. Sonymen qatar, joǵary oqý oryndary men kolledjderde - 41, al kásiporyndarda - 13 jastar isi komıtetteri bar. Onda 400 myńǵa jýyq jas múshelik etedi», - dedi Balmarjan Polatqyzy. 
Budan ózge, Elbasynyń tikeleı bastamasymen júzege asyrylyp kele jatqan «Serpin» baǵdarlamasy boıynsha Ońtústikten 7500-den astam jas Soltústik óńirlerdegi oqý oryndarynda bilim alýda. Osylaısha jalpy respýblıka kóleminde bólingen 15 myńǵa jýyq granttyń 50 paıyzdan astamyn Ońtústik Qazaqstan oblysynyń jastary ıelengen.
