OQO dıqandarynyń ónimderi astanalyqtarǵa tegin taratyldy
ShYMKENT. QazAqparat - Astana qalasyndaǵy Ońtústik Qazaqstan oblysynyń kúnderi aıasynda ótip jatqan aýyl sharýashylyǵy taýar óndirýshileriniń jármeńkesinde Maqtaral aýdanynan barǵan birneshe ónim túrleri tegin taratyldy, dep habarlaıdy QazAqparat HAA tilshisi.
Maqtaral aýdany ákimdigi baspasóz qyzmetiniń málimetinshe, Myrzashól óńirinen jetkizilgen 10 tonna qaýyn men 350 keli qaýynnyń qaǵy, sondaı-aq 10 tonna qarbyz bas qalanyń turǵyndaryna tartý etildi. Budan bólek, aýdannan jiberilgen 3 tonna qyzanaq, 3 tonna qııar, 2 tonna qyryqqabat, 2 tonna pııaz, 2 tonna sábiz, 1 tonna bolgar buryshy, 2 tonna baıaldy, 3 tonna kartop, 15 tonna qarbyz, 15 tonna qaýyn men 1 tonna jemis-jıdek ónimderi 15 paıyz jeńildikpen satylýda.
«Astanadaǵy Ońtústik Qazaqstan oblysy kúnderi aıasynda tegin qaýyn taratylyp jatqanyn estip kelip otyrmyz. Álemdegi eń tátti qaýyn Myrzashóldiń qaýyny desem artyq aıtqandyq emes. Degenmen, Astanada onyń baǵasy qymbat bolǵandyqtan kóp stýdentterdiń ony satyp alýǵa shamasy kele bermeıdi. Búgin biz sııaqty stýdentterdiń qýanyshynda shek joq. Jańa oqý jylyn osylaısha molshylyqpen bastap jatyrmyz» - dedi Astanalyq stýdent Aıdana Bazarbaeva.
