OQO dıqandary Qurban aıtqa oraı jaǵdaıy tómen otbasylarǵa tegin qaýyn-qarbyz taratty

ASTANA. QazAqparat - Ońtústik Qazaqstan oblysynyń dıqandary  «Qurban aıt» merekesine oraı Astana qalasyndaǵy 200 áleýmettik jaǵdaıy tómen otbasy men 3 arnaıy áleýmettik kómek kórsetý mekemesine tegin qaýyn-qarbyz taratty, dep habarlaıdy oblystyq ákimdiktiń baspasóz qyzmeti.

Ondaǵy maqsat - halyqtyń ál-jýaz tobyna qoldaý kórsetip, ońtústiktiń jerinde ósken táttiligi til úıirer qaýyn - qarbyzdan dám tatqyzý.

Tizimdi dıqandarǵa  Astana qalasy ákimdiginiń «Áleýmettik qyzmet kórsetý ortalyǵy» memlekettik mekemesi beripti. Osylaısha sharýalar ońtústikqazaqstandyqtardyń darhandyǵy men eńbekqorlyǵyn kórsetip, erteńgi ulyq merekeniń qadir-qasıetin arttyra tústi.

Aıta keteıik, Astana qalasynda 2-3 qyrkúıek kúnderi «EKSPO - 2017» halyqaralyq kórmesine arnalǵan Ońtústik Qazaqstan oblysy aýyl sharýashylyǵy ónimderiniń jármeńkesi ótkiziledi. «Qazaqstan» sport alańshasynda ótetin jármeńkege quny 265 mln. teńge bolatyn  500 tonnadan astam aýyl sharýashylyǵy ónimi  usynylatyn bolady.