OQO dárigerleri Ońtústik Koreıanyń medıtsına ortalyqtarynda tájirıbe almasady
ShYMKENT. QazAqparat - Ońtústikqazaqstandyq dárigerler Ońtústik Koreıanyń medıtsına ortalyqtarynda tájirıbe almasady. Óńirge Seýl qalasyndaǵy Sýn Chon Hıan atyndaǵy ýnıversıtet janyndaǵy kópsalaly medıtsınalyq ortalyǵynan kelgen mamandarmen kezdesý barysynda osyndaı kelisim jasaldy, dep habarlaıdy QazAqparat HAA tilshisi.
Ortalyqtyń dırektory, doktor, professor Kım Hen Chol bastaǵan dárigerler Shymkenttegi oblystyq klınıkalyq aýrýhananyń basshylarymen kezdesip, medıtsınalyq mekemeniń jaǵdaıymen tanysty. Eki tarap arasyndaǵy yntymaqtastyq jónindegi arnaıy memorandýmǵa qol qoıyldy. Oblystyq densaýlyq saqtaý basqarmasynyń basshysy Muqan Egizbaev osy kelisim aıasynda sheteldik mamandardyń oblystaǵy dárigerler arasynda sheberlik synyptaryn ótkizip, ozyq tehnologııalarmen tanystyratynyn atap ótti. Óıtkeni sheteldik dárigerler aǵza aýystyrý, transplantatsııa salasynda mol tájirıbe jınaqtaǵan. Olar sondaı-aq balalar arasynda týabitti tańdaıdyń joqtyǵy, aýyz qýysynyń durys qalyptaspaýy sııaqty kemistikter olardyń sóıleýine, tipti kúlýine de mursha bermeıtin kórinedi. Osyndaı aqaýlary bar talaı sábı Kım Hen Chol basqarǵan bilikti mamandardyń kómegimen qulan taza aıyqqan.
«Ońtústikkoreıalyq mamandar tek eresekterdi ǵana emes, búldirshinderdi de emdeýden baı tájirıbe jınaqtaǵan. Búginde balalar arasynda mundaı qaýipti aýrýlar kóbeıip keledi. Óńirimizdiń densaýlyq saqtaý salasyn órkendetý úshin aldaǵy ýaqytta biz bir memleketpen, ıaǵnı bir aýrýhanamen qarym-qatynasty jolǵa qoıýmen ǵana shektelip qalmaımyz. Mundaı tıimdi jobalardy ári qaraı josparlaýdamyz», - dedi oblystyq densaýlyq saqtaý basqarmasynyń basshysy Muqan Egizbaev.
Basqarma basshysy aǵylshyn tilin jetik biletin jergilikti eki maman jaqyn arada Koreıa memleketine biliktiligin arttyrýǵa barady dep otyr. Olardyń oqý aqysy men jol shyǵyndaryn atalmysh basqarma óz moınyna almaq. Ońtústik Koreıanyń medıtsına salasyndaǵy tamasha jetistikteri kóp ekenin eskersek, oblystaǵy aq halattylar kásibı sheberligin arttyrýy asa mańyzdy. Kezinde Ońtústik Koreıa eliniń dárigerlerin densaýlyq saqtaý isindegi zamanaýı tehnologııalarmen tanystyryp, ozyq tájirıbege baýlyǵan alpaýyt AQSh memleketiniń bilikti maıtalmandarynan kóp nárseni úırengen.
«Ómir bir ornynda turmaıdy. Jańalyqqa kúndelikti ilesip otyrmasań, kóshten qalasyń. Ásirese, medıtsınadaǵy jańalyqtar shapshań damý ústinde. Sondyqtan biz únemi tájirıbemizdi damytyp otyramyz. Bizge kómekke júgingen naýqastarǵa jan-jaqty medıtsınalyq tekserýler tolyq júrgiziletin bolady. Eń bastysy, aýyr naýqasqa shaldyqqan azamattarǵa úmit syılaı alamyz», - deıdi professor Kım Hen Chol.
