OQO dárigerleri alǵash ret júrek almastyrý otasyn jasady
ShYMKENT. QazAqparat - Ońtústik Qazaqstanda alǵash ret júrek otalary jasaldy. Bul týraly oblystyq densaýlyq saqtaý basqarmasynyń basshysy Muqan Egizbaev málimdedi, dep habarlaıdy QazAqparat HAA tilshisi.
Baspasóz máslıhatynda Túrkııadan arnaıy kelip Shymkentte sheberlik sabaǵyn ótkizgen Ystanbul qalasy aýrýhanasynyń bólim meńgerýshisi, medıtsına ǵylymdarynyń doktory Belham Akpınar men kardıoortalyqtyń bas dárigeri Spandııar Bekjigitovter de ota jaıynda aqpar berdi.
«Eki kúnde júrektiń qaqpaqshalar qurylymdaryn rekonstrýktsııalaý men protezdeý jáne ıntraoperatsıondyq radıojıilik abelıatsııalaýdy paıdalana otyryp arotokoronarlyq shýnttaý otasyn 5 naýqasqa jasadyq. Bul ota júrektiń ıshemııalyq aýrýymen qatar, qaqpaqshalarynyń zaqymdanýy anyqtalyp, yrǵaǵynyń buzylýy asqynǵan naýqastarǵa jasalynady»,-dedi Belham Akpınar.
«Bul kásibı mamandardyń maqsaty oblystaǵy dárigerlerdiń biliktilikterin arttyrý, halyqtyń densaýlyǵyn jaqsartý, kúrdeli otalardy dárigerlerimizge úıretý. Buryn mundaı otalar Almaty men Astanadaǵy respýblıkalyq ortalyqtarda ǵana jasalyp kelgen bolsa, oblystyq deńgeıde alǵash ret qolǵa alyndy. Bul álemniń kez kelgen damyǵan elinde jasala bermeıtin kúrdeli ota. Aıta ketýimiz kerek, jasalǵan otalardyń barlyǵy da memleket esebinen qarjylandyrylǵan, tegin»,- dedi Oblystyq densaýlyq saqtaý basqarmasynyń basshysy.
Muqan Egizbaev sondaı-aq túrik eliniń mamandarymen kelisimge kelgenin atap ótti. Oǵan sáıkes, jergilikti dárigerler túrik eline baryp, biliktilikterin jetildiretin bolady. Al, jol shyǵyndarynan basqasyn, as-aýqatynan bastap, jatatyn orny men oqýyna deıingi shyǵyndardy túgel Túrkııa tarapy óz mindetine alyp otyr. Bul oblys dárigerlerine berilgen mol múmkindik, úlken kómek bolmaq. Keleshekte mundaı kúrdeli otalardy óńirdiń dárigerleri de jasaı beretin bolady.
«Bul bir adamnyń qolynan keletin ota emes, keminde úsh dáriger qatysady. Otanyń alǵashqy kezeńin bizdiń qatysýymyzben Belham myrza jasady. Odan keıingisin men jasadym, professordyń keńesimen. Bárimiz úırendik. Otaǵa baılanysty suraqtarymyzǵa qanaǵattanarlyq jaýabymyzdy aldyq. Qajetti derekterdi jazyp aldyq. Oqyp, oń nátıje shyǵaryp, ári qaraı jalǵastyra alatynymyzǵa senimdimin. Kópshiliktiń kózinshe ýáde de bere alamyn. Búgin sonyń aıǵaǵy retinde ózimiz ota jasaıtyn bir naýqasty otaǵa daıyndap jatyrmyz»,- dep aǵynan jaryldy kardıohırýrgııa bóliminiń meńgerýshisi Baýyrjan Baıtóre.
Sońǵy eki jylda oblystyq kardıoortalyqta 620 júrekke ota jasalynypty, 2015 jyly - 310, 2016 jyly - 310. Qazaqstanda kardıohırýrgııalyq ota jasaıtyn 27 ortalyq bar. Sonyń ishindegi Almaty qalasyndaǵy A.Syzǵanov atyndaǵy Ulttyq ǵylymı hırýrgııa ortalyǵynda byltyr 274 ota jasalypty. Shymkentte bul kórsetkish 46-ǵa kóp. Jalpy, oblystyq kardıoortalyqta sońǵy 7-8 jylda 3000 júrekke ashyq ota jasalǵan.
