OQO-dan soltústikke qonys aýdarýǵa nıettengen 125 otbasy jolǵa shyqty
ShYMKENT. QazAqparat - Ońtústik Qazaqstan oblysynan soltústikke qonys aýdarǵysy keletin 125 otbasy jolǵa shyqty. Olardyń arasynda 10-ǵa tarta shańyraq býynyp-túıinip, qonystanýǵa qamdanǵan, dep habarlaıdy QazAqparat tilshisi.
Alys jolǵa shyqqandardyń basym kópshiligi teriskeıdegi múmkindiktermen tanysyp qaıtý úshin attandy. Olar soltústik oblystarynan turaqty jumys taýyp, jeri qunarly óńirde eginshilik pen qus sharýashylyǵyn túletsek deıdi. Pavlodar, Qostanaı, Soltústik Qazaqstan oblystaryna qonys aýdarýshylardyń ishinde buǵan deıin ondaǵy jaǵdaıdyń jaı-japsarymen tanysyp kelgender de az emes. Sala mamandarynyń sózinshe, qonys aýdarǵandar turǵyn úı, jer, áleýmettik paketpen qamtamasyz etiledi. Ári bul jaǵdaı ákimdiktegilerdiń tikeleı baqylaýynda bolady. Ózge óńirge jınalǵan kóshti jergilikti bılik ókilderi men halyq qalaýlylary shyǵaryp saldy.
Aıta keteıik, 2015-2017 jyldar aralyǵynda 400-ge tarta otbasy soltústikke qonys aýdarǵan. Olar jumyspen qamtylyp, ár túrli salada jemisti jumystar atqarýda. Kósh bıyl da jalǵasady. Jyl aıaǵyna deıin taǵy 665 otbasy qonys aýdarady dep josparlanyp otyr.
