OQO-dan soltústik óńirlerge 672 otbasy qonys aýdarýǵa nıetti
ASTANA. QazAqparat - Ońtústik Qazaqstan oblysynan soltústik óńirlerge 672 otbasy qonys aýdarýǵa nıetti. Bul týraly Ońtústik Qazaqstan oblysynyń ákimi Janseıit Túımebaev málim etti, dep habarlaıdy QazAqparat.
«Elbasy Joldaýynda basy artyq jumys kúshi bar óńirlerden basqa jerlerge qonys aýdarý týraly aıtyp ótti. Jumys kúshi mol óńirlerden soltústik óńirlerine eńbek resýrstaryn qonys aýdarý maqsatynda oblystaǵy halqy tyǵyz ornalasqan Maqtaral, Saryaǵash, Shymkentte ótkizilgen «Eńbek rynogynyń utqyrlyǵyn damytýdyń bıznes-forýmy» men bos jumys oryndary jármeńkelerine Qostanaı, Pavlodar, Soltústik Qazaqstan, Shyǵys Qazaqstan oblystarynan 60-tan astam ókilderi qatysty. Qazir 2 019 múshesi bar 672 otbasy qonys aýdarýǵa nıet bildirýde. Onyń ishinde eńbekke qabiletti 1 008 adamnyń 116-sy aýyl sharýashylyǵymen, 98-i kásipkerlikti damytýmen aınalysýǵa, 794-i memlekettik kásiporyndarǵa jumysqa ornalasýǵa daıar», - dedi óńir basshysy Ortalyq kommýnıkatsııalar qyzmetindegi baspasóz máslıhatynda.
Onyń sózine qaraǵanda, bıyl ortasha aılyq jalaqy 15,8 paıyzǵa ósip, 98 960 tengege jetti. Jumyssyzdyq deńgeıi 5,2 paıyzdy qurady.
«Bul rette, jumyssyzdyq deńgeıin tómendetý, kásipkerlikti qoldaý maqsatynda memlekettik baǵdarlama sheńberinde 2017 jyly 10,9 mlrd teńge bólinip, 64 myńnan astam adam qamtý kózdelýde. Baǵdarlama aıasynda 2017 jyldyń 1 toqsanynda 21 192 adamǵa áleýmettik qoldaý sharalary kórsetildi. Jalpy 3 330 jumys orny quryldy. Sonymen qatar, ortalyq atqarýshy organmen Memorandým jasalyp, 66 764 jańa jumys oryndary ashylýy josparlandy», - dep atap ótti ol.
