OQO-dan Qytaıǵa eksporttalatyn aýylsharýashylyq ónimderi artady

ASTANA. QazAqparat - Ońtústik Qazaqstan oblysynyń ákimi Janseıit Túımebaev Qytaı Halyq Respýblıkasy «Shensı aýyl sharýashylyǵy ekonomıkalyq birlestigi» kompanııasynyń Prezıdenti Fang Shı Djıng bastap kelgen delegatsııasymen kezdesti. Basqosýda taraptar eki el arasyndaǵy ekonomıkalyq baılanysty nyǵaıtý jáne óńirimizde óndirilgen aýyl sharýashylyq ónimderin Qytaıǵa eksporttaý máselesin talqylady.

Óńir basshysy aýyl sharýashylyǵy salasynyń áleýetimen tanystyra kele, oblystyń daıyn ónimdi eksporttaýǵa degen múmkindigi mol ekenin aıtty.

«Bizdiń oblys elimizdegi maqta talshyǵy men maqta maıyn 100 paıyz, jemis, kókónis, júzim, baqsha, et, qus eti, balyq, sút ónimderin iri kólemde óndiretin jáne sol ónimderdi respýblıka aımaǵynan syrtqa eksporttaýshy aımaq bolyp tabylady. Óńir halqynyń jergilikti azyq-túlik ónimderimen qamtamasyz etý teńgerimine sáıkes, jemis-jıdekpen 1,2 ese, kókónispen 3,4 esege, baqsha ónimderimen 4,6 ese, júzimmen 5,9 ese qamtamasyz etilip, artyǵy eksportqa shyǵarylady. Oblys ekonomıkasynyń túrli salasyna ınvestıtsııa tartý óte qolaıly, oǵan memleket tarapynan qajetti jaǵdaılardyń barlyǵy jasalǵan», - dedi Janseıit Túımebaev.

Óz kezeginde qonaqtar jyl ótken saıyn Qytaıda aýyl sharýashylyǵy ónimderine degen suranys artyp kele jatqanyn jetkizdi. Máselen, bir ǵana Shensı oblysy byltyr 7 mln tonna as maıyn, 8 mln tonna sıyr etin, 5 mln tonna qoı etin tutynǵan. Qytaılyqtar suranysqa baılanysty bul kórsetkishti 10 paıyzǵa deıin arttyrýdy kózdeıdi. Sondaı-aq, delegattar búgingi kúni elimizde óndirilgen azyq-túliktiń 10-nan astam túri Qytaı naryǵyna shyǵyp jatqanyn aıta kele, taǵy qosymsha un, et, maı ónimderin alýǵa múddeli ekenin málimdedi.

Qonaqtardyń usynystaryn tyńdap shyqqan oblys ákimi sala basshylaryna kórshi eldiń eksporttyq suranysyn baǵyttalǵan jumystardy júıelendirýdi tapsyrdy.