OQO-dan Italııaǵa qarakól terisi eksporttalady
ASTANA. QazAqparat - Ońtústik Qazaqstan oblysynda qarakól qoı tuqymyn kóbeıtý jumystary qarqyndy túrde qolǵa alynýda. Óıtkeni sharýalar qarakól qoıynan keler tabystyń mol bolatynyn aıtýda. Negizinen qarakól sharýashylyǵyn shól jáne shóleıitti aımaqtarda kóbeıtip, damytý qolaıly bolyp keledi. Sondyqtan da Arys aýdanynyń Baıyrqum aýyldyq okrýgindegi «Baıyrqum-Agro» sharýashylyǵy qarakól ósirýdi qolǵa alyp, onyń sanyn kóbeıtýdi josparlap otyr, dep habarlaıdy oblystyq ákimdiktiń baspasóz qyzmeti.
Jaıylymdyq jeri 4900 ga bolatyn sharýashylyqta búginde 2000 bas qarakól tuqymy ósirilse, jyl sońyna deıin 20 myń basqa jetkizý kózdelip otyr. Búginde qundy bolyp esepteletin qarakóldiń terisin Italııa eline eksporttaý úshin kelisim shart jasalǵan. Ósimtal bolyp keletin bul qoıdyń terisi naryqta 100 AQSh dollaryna baǵalanyp otyr.
Al bul qoı tuqymy uzaq qashyqtyqta jaıyla alady. ıAǵnı, jaı qoılar 3-4 shaqyrym jerge deıin baryp jaıylsa, qarakól táýligine 10-15 shaqyrymǵa deıingi qashyqtyqqa ketip jaıyla alady. Sondaı-aq, ishilgen sýdyń joǵary mıneraldanýyn jáne aýa temperatýrasynyń kúrt aýytqýyn jaqsy kóteredi.
Al, sharýashylyqta 5 birlik MTZ-80 traktory men 3 avtokóligi jáne 8 adam eńbek etýde. Qarakól qoıyn damytý úshin sharýashylyq memleketten 35 mln. teńge sýbsıdııa alǵan.
Sonymen qatar, Sozaq aýdanyndaǵy «Qumkent» jáne «Qaraqur» óndiristik kooperatıvi de osy qarakól qoıyn ósirýmen aınalysyp keledi. Olar ótken jyly qarakól toqtysyn Birikken Arab Ámirlikterine eksportqa shyǵaryp, tıimdi baǵada satty. Sheteldikterdiń qoı alýdaǵy talaptarynan tolyqtaı shyqqan kooperatıv taǵy da birqatar qarakól qoıyn shetelge satýdy josparlaýda.
