OQO-dan Álimjan Qurtaev senator bolyp saılandy
ShYMKENT. QazAqparat - Ońtústik Qazaqstan oblysynda da senat depýtattyǵyna saılaý óz deńgeıinde ótti. Oǵan oblystaǵy máslıhattardan 308 depýtat qatysyp, óz tańdaýlaryn jasady, dep habarlaıdy QazAqparat HAA tilshisi.
Ońtústik óńirinen senator bolýǵa bastapqyda 5 úmitker usynylǵan bolsa, onyń úsheýi óz kandıdatýrasyn alyp tastaýǵa ótinish túsirgen. Sóıtip, «Nur Otan» partııasy oblystyq fılıaly tóraǵasynyń birinshi orynbasary Álimjan Qurtaev pen «Standart Tsement» zaýytynyń bas ınjeneri Seıitjappar Esjanov negizgi úmitkerler retinde qaldy. Búgin tańerteńnen bastap ótken saılaýǵa bas-aıaǵy 312 depýtat qatysýy kerek bolǵan. Alaıda 4 halyq qalaýlysy ózderiniń densaýlyǵy men issaparǵa ketýine baılanysty saılaýǵa kele almaıtyndyqtaryn jetkizgen. Nátıjesinde saılaýǵa qatysý kórsetkishi 99,3 paıyzdy qurady. Bir saǵat ýaqytqa sozylǵan saılaý barysynda qortyndysy da jedel túrde shyǵaryldy. Oblystyq ortalyq saılaý komıssııasynyń tóraǵasy Álibek Ómiralıevtiń sózinshe, 253 depýtat Álimjan Qurtaevqa daýys bergen. Bul 82,3 paıyzdy quraıdy. Onyń qarsylasy Seıitjappar Esjanovty 55 depýtat qoldaǵan. Osylaısha «Nur Otan» partııasy oblystyq fılıaly tóraǵasynyń birinshi orynbasary senatorlyqqa ótti.
