OQO-dan 100 tonnadaı maqta Qytaı men Túrkııa elderinen tasymaldandy

ShYMKENT. QazAqparat - Ońtústik Qazaqstan oblysy, Maqtaral aýdanynyń sharýalary bıyl shıtten tapshylyq kórmeıtin bolady. Óıtkeni búginniń ózinde aýdanda 2 502 tonna shıt daıyndalǵan. Onyń 100 tonnadaıy Qytaı men Túrkııadan tasymaldanǵan, dep habarlaıdy QazAqparat HAA tilshisi.

Sala mamandarynyń sózinshe sheteldik shıttiń kelisi 1 350-1 400 teńgeden satylýda.  Al, otandyq shıttiń bir keli baǵasy - 230 teńgege turaqtaǵan.   

«Otandyq shıt pen sheteldik shıttiń aıyrmashylyǵy - sapasynda. Byltyr maqta uryǵynyń túrkııalyq surpyn ekken dıqandar gektaryna 30-35 tsentnerden ónim jınady. Biraq ol shıttiń baǵasy qymbat. Sondyqtan myrzashóldik maqtashylar otandyq shıtti paıdalanǵandy durys kóredi. Bıylǵy kóktemde bizdiń mekememiz 150 tonnadaı shıt ázirledi», - deıdi «Baqytjan» óndiristik koopertıviniń tseh meńgerýshisi Jandarbek Ábenov.

Byltyr óńirde shıttiń kelisi 160 teńgeden bosatylypty. Baǵanyń bir jylda 100 teńgege sharyqtap ketýiniń sebebin «Baqytjan» ÓK-degiler uryqtyq shıt daıyndaýǵa ketetin jaryq, sý jáne mıneraldy qospalardyń edáýir qymbattap ketkenimen baılanystyryp otyr.

«Baǵanyń 100 teńgege ósýi shyǵyndardyń kóbeıýine baılanysty bolyp otyr. Qazirgi tańda sapaly shıt daıyndaý isi de ońaı emes. Desek te baǵanyń 100 teńgege qymbattaǵanyna dıqandar túsinistikpen qaraýda. Kóktemgi egistik jumystary qyzǵan shaqta baǵanyń turaqty bolýyna yqpal etemiz dep otyrmyz. Eń bastysy - Maqtaaralda bıyl shıt tapshylyǵy oryn almaıdy»,- deıdi Jandarbek Ábenov.

Esterińizde bolsa, byltyrǵy kóktemde maqtaaraldyq maqtashylar shıt tapshylyǵyn qatty sezingen bolatyn. Sonyń saldarynan kóktemgi maqta egý isi kesheýildegen. Byltyrǵy jylǵy tapshylyqty basynan keshken Mıraly Qoldabaev 4 gektar maqta alqabyna qajetti 100 keli shıtti naqty aqshasyna satyp aldy.

«Ózimizge shıttiń «Maqtaral» surpy óte qolaıly. Kúnniń ystyǵy men aǵyn sýdyń tapshylyǵyna tózip bere alady. Sondyqtan «Baqytjan» óndiristik kooperatıvinen shıt satyp aldym. Bıyl sharýa qojalyǵyma qarasty 8 gektar egistikke maqta egýdi oılastyryp otyrmyn»,- deıdi «Kópjasarata» sharýa qojalyǵynyń basshysy Mıraly Qoldabaev.

Bıyl myrzashóldik maqtashylar 80 myń gektar jerge shıtti maqta egýdi jolparlap otyr. Qazir sonyń 2500 gektaryna shıt sebilipti. Sharýalar shıt sebetin tehnıkalar saqadaı-saı tursa aldaǵy 10 kúnde maqta egý isin tegis bitirmek. Ótken jyly aýdanda egiletin maqta daqylynyń kólemi 83 myń gektardy qurapty. Onyń ishinde, 20 myń gektar jerge ınnovatsııalyq tehnologııalardy keńinen qoldana otyryp, maqta shıkizatyn óndirýge ketetin shyǵyndardy barynsha azaıtyp, egilipti. Bul úrdis bıyl da jalǵasyn tappaqshy.