OQO-daǵy zorlaý oqıǵasy: 7 jasar balany saraptamadan ótýge Almatyǵa alyp ketti
ShYMKENT. QazAqparat - Ońtústik Qazaqstan oblysynda zorlaý qylmystyq isi boıynsha ótip jatqan jábirlenýshi balany týystary Almatyǵa alyp ketti. Onda dárigerler 7 jasar jetkinshekti tekserip, táýelsiz saraptamadan ótkizedi. Bul týraly QazAqparat tilshisine jábirlenýshiniń qorǵaýshysy Qurmanǵazy Músir málim etti.
Buǵan deıin habarlaǵanymyzdaı, Abaı aýylynda birinshi synyp oqýshysyn zorlaý oqıǵasyna qoǵam belsendileri aralasa bastady. «DOM» qaıyrymdylyq qorynyń basshysy Arýjan Saınniń aıtýynsha, olar balany jetekshi mamandarǵa qaıta teksertip, táýelsiz saraptama jasatatyn bolady.
Qurmanǵazy Músirdiń sózinshe, búgin jetkinshek turatyn aýylǵa Astanadan Qazaqstan Respýblıkasyndaǵy Bala quqyqtary jónindegi ýákil, Parlament depýtaty Zaǵıpa Balıevanyń tapsyrmasymen monıtorıngilik toptyń ókilderi kelgen. Top quramyndaǵy zańger men psıholog jábir kórgen bala men ájesimen tildesip, mán-jaıdy surastyryp bilgen.
«Astanadan kelgen azamattar ózderiniń kásibı jumystaryn júrgizip, balamen de, ájesimen de kezdesti. Ózderiniń kómegin usyndy. Biraq biz olardyń kómeginen bas tartýǵa májbúr boldyq. Sebebi, buǵan deıin ózderiniń kómegin usynǵan «DOM» qaıyrymdylyq qorynyń basshysy Arýjan Saınǵa baramyz dep ýáde berip qoıǵanbyz. Qalaı bolǵanda da biz monıtorıngilik toptyń kómeginen qashpaımyz, qajet bolǵan jaǵdaıda olarǵa habarlasamyz», - deıdi ol.
Qorǵaýshynyń aıtýynsha, sondaı-aq búgin tańerteń Abaı aýylyna oblystyq ІІD-den balany ájesimen birge alyp ketýge tártip saqshylary kelgen. Alaıda jábirlenýshi tarap oblys ortalyǵyna barýdan bas tartqan. 
«Búgin tańerteń polıtsııa kelip, jábirlenýshilerdi Shymkentke alyp ketpekshi boldy. Polkovnık Dálbekovtyń buıryǵymen kelip turmyz dep túsindirdi. Biraq oǵan kelisimimizdi bermedik», - deıdi ol.
Aıta keteıik, 7 jasar balany urý jáne zorlaý faktisi boıynsha qylmystyq is qozǵalyp, onyń tergelýin OQO ІІD basshylyǵy óz baqylaýyna alǵan bolatyn.
Budan bólek, Qurmanǵazy Músir búgin Abaı aýylyna Astanadan Baýyrjan Adamov esimdi qorǵaýshy kelgenin aıtty. Jábirlenýshi tarap zańgerdiń kómegin qabyldaýǵa kelisimin berdi.
