OQO-daǵy jalǵyz «Muz saraıy» satylyp ketti
ShYMKENT. QazAqparat - Ońtústik Qazaqstan oblysyndaǵy eń úlken ári jalǵyz «Muz saraıy» jekemenshikke satyldy. Shymkent qalalyq ákimdiginiń málimetinshe, sport kesheni 128 mln teńgege saýdalanǵan, dep habarlaıdy «QazAqparat» HAA tilshisi.
Elektrondyq aýktsıon negizinde saýdaǵa shyǵarylǵan saraı tómendetilgen baǵamen satylyp otyr. Onyń bastapqy baǵasy 996 mln 944 myń teńge bolyp belgilengen bolatyn. Alaıda bul somaǵa eshkim satyp alýǵa nıet bildirmegen. Sodan keıin onyń baǵasy tómendetilgen.
Shahar basshylyǵy 128 mln teńgeniń «Muz saraıynyń» 67 paıyz úlesine tólengenin aıtady. Sport keshenin satyp alýǵa bul somany «MunaıQurylysServıs» JShS-i tólegen. Seriktestik kúngeıdegi tanymal kásipker Serikjan Seıitjanovqa tıesili ekeni belgili. Kásipker buǵan deıin óz ıeligindegi «SAÝTS-OIL» JShS-niń atyna sport kesheniniń ózge 33 paıyz úlesin de satyp alǵan bolatyn.
Aıta keteıik, «Muz saraıy» óńirdegi qysqy sport túrlerimen jattyǵatyn jalǵyz keshen bolyp tabylady. Alaıda ony ustap turý biraz qıyndyq týǵyzǵan. Mamandardyń sózine qaraǵanda, sońǵy úsh jylda nysannyń shyǵyny 40 mıllıon teńgege jetken. Shyǵyndardyń basym bóligi kommýnaldyq qyzmet tarıfteriniń ósýinen týyndaǵan edi.
