OQO-daǵy taý bókterinde qujatsyz qarýmen júrgen turǵyn ustaldy
ShYMKENT. QazAqparat - Ońtústik Qazaqstan oblysynyń Sozaq aýdanyndaǵy «Kishi qara qus» taý bókterinde qujatsyz qarýmen júrgen turǵyn ustaldy. Tártip saqshylary 19 jastaǵy jigittiń eki uńǵyly sholaq myltyǵy men eki dana oǵyn tárkiledi, dep habarlaıdy QazAqparat HAA tilshisi.
Zań buzǵan azamat «Tabıǵat» jedel aldyn alý sharasy barysynda qolǵa tústi. Oblystyq Jergilikti polıtsııa qyzmeti men tabıǵatty qorǵaý ınspektorlary birlesip ótkizgen reıdtiń maqsaty - ekologııalyq qylmystardyń aldyn alý jáne anyqtaý, brakonerlik áreketterdiń jolyn kesý, sý bıoresýrstaryn qorǵaý boldy. Shara kezinde ósimdikterdiń nemese janýarlardyń sırek kezdesetin túrlerin jáne jer qoınaýyn óz betinshe zańsyz paıdalanýǵa qatysty 3 ekologııalyq qylmys anyqtalyp, 25 ákimshilik quqyqbuzýshylyq tirkeldi. 190 myń teńgeden asa aıyppul salynǵan.
Máselen, taýly jerde qarý qoldanǵan jigitke qatysty Qylmystyq kodekstiń 288-baby 1-bóligimen «Qarýdy zańsyz jasaý» áreketi boıynsha qylmystyq is qozǵalyp, sotqa deıingi tergep-tekserý amaldary júrgizilýde. Odan ózge Saryaǵash aýdanyndaǵy Keles ózeni arnasynda zańsyz jer qoınaýyn paıdalanyp jatqan azamat anyqtaldy. 34 jastaǵy jergilikti turǵyn ekskavatormen zańsyz qum-tas qazyp saýdalap, óz paıdasyna jaratyp júrgen. Atalǵan jaıt boıynsha da qylmystyq is qozǵalyp, sotqa deıingi tergeý amaldary júrgizilýde. Tárkilengen tehnıka avtoturaqqa qoıyldy.
Polıtseılerdiń málimetinshe «Tabıǵat» jedel aldyn alý is-sharasy oblys aýmaǵynda aǵymdaǵy jyldyń 31 shildesine deıin jalǵasatyn bolady.
