OQO-daǵy shalǵaı aýdanda 20 úı berilip, 55 ga jer úlestiriledi
ShYMKENT. QazAqparat - Ońtústik Qazaqstan oblysy Báıdibek aýdanynda turǵyn úı qurylysy qarqyn alǵan. Qazirdiń ózinde Shaıan aýylynda «Nurly jer» baǵdarlamasy aıasynda 20 úı salynyp jatyr. Olar aldymen, áleýmettiń álsiz tobyna berilmek, dep habarlaıdy QazAqparat HAA tilshisi.
Aýyl irgesindegi 55 gektar jer úı irgelik jer telimi de kezekke turǵandardyń enshisine berilmekshi. Úı irgelik jerler aldymen taptalyp, tas tóseledi. Aýyzsý, gaz qubyry tartylyp, elektr baǵanalary ornatylady. Infraqurylymmen tolyq qamtylǵannan keıin ǵana kezekte turǵan azamattarǵa rásimdeledi. Bul óz kezeginde kóptegen kıkiljińniń aldyn alady,- deıdi sala mamandary.
«Ol jerge kezekte turǵan 326 azamat úı salatyn bolady. Odan bólek kommýnaldyq 20 úıdiń qurylysy júrgizilip jatyr qazir. Bul úıler ótpeli, kelesi jyldyń kókteminde paıdalanýǵa beriledi»,-deıdi Báıdibek aýdany ákiminiń orynbasary Nurǵalı Aıtbekov.
Sheneýniktiń sózinshe áleýmettik baspanalar tolyq bitkennen keıin muqtaj jandarǵa tapsyrylady. Aýdanda sonymen qatar jol keńeıtilip, jańa jobalar júzege asýda. Sonyń biri - balalar alleıasy. Kezinde qoqyshanaǵa aınala jazdaǵan eski jataqhana súrilip, ornyna balalar serýendeıtin saıabaq eńse tiktegen. Jergilikti bılik tarapynan aýdanǵa ınvestorlar tartý máselesi de oń sheshimin tapqan. Aldaǵy ýaqytta Shaıanda tennıs korty men jabyq basseın qurylysy bastalady dep kútilýde. Osy maqsatta Arab ámirlikterinen kelgen kásipkerlermen kelissózder júrgizilip, ońtaıly sheshimin tabýda eken.
