OQO-daǵy pedagogıkalyq ýnıversıtet 80 jyldyq mereıtoıyn atap ótti
ShYMKENT. QazAqparat - Ońtústik Qazaqstan memlekettik pedagogıkalyq ýnıversıteti bıyl 80 jyldyq mereıtoıyn atap ótti. Atalǵan oqý ordasynyń mereıli merekelik sharasyna QR Bilim jáne ǵylym mınıstri Erlan Saǵadıev pen oblys ákimi Janseıit Túımebaev, QR Parlamenti Senatynyń jáne Májilisiniń depýtattary men QR Ulttyq ǵylym Akademııasynyń akademıkteri, oblystyq maslıhat depýtattary jáne joǵary oqý oryndarynyń retkorlary men prorektorlary qatysty, dep habarlaıdy QazAqparat tilshisi.
Joǵarǵy oqý ornyn seksen jyldyq meroıtoıymen quttyqtaǵan aımaq basshysy ýnıversıtet uzaq jylǵy dańqty tarıhynda úlken bedelge ıe bolǵanyn atap ótti.
«Sapaly professorlyq-oqytýshylyq quramymen otandyq ǵylym men bilimniń kóshbasshysy atanǵan bul bilim ordasy - 60 myńǵa jýyq pedagogtar men kóptegen memlekettik jáne qoǵamdyq qaıratkerlerge altyn uıa boldy. Shymkent muǵalimder ınstıtýty bolyp ashylǵan 1937 jyldan bastap ulttyń zııaly, mádenı jáne rýhanı áleýetin qurýdyń negizi bola bilgen ýnıversıtet kúni búginge deıin qabiletti, básekelese alatyn alǵyr jańashyl mamandardy daıyndap keledi. HH ǵasyrdyń alǵashqy jyldarynda qoǵamdyq qajettilikten dúnıege kelgen eki jyldyq muǵalimder ınstıtýty óz tarıhynda damý men órkendeýge qol jetkizdi», - dedi Janseıit Túımebaev.
Budan bólek, saltanatty jıynda jas urpaqty oqytý jáne tárbıeleý isindegi eleýli tabystary úshin «Ybyraı Altynsarın» tósbelgisimen, ǵylym jáne bilim berý salasyndaǵy erekshe eńbegi úshin «Qazaqstan Respýblıkasynyń ǵylymyn damytýǵa sińirgen eńbegi úshin», «Qazaqstan Respýblıkasynyń bilim berý isiniń qurmetti qyzmetkeri» tósbelgilerimen jáne Ońtústik Qazaqstan oblysyna sińirgen eńbegi úshin medalimen, oblys ákiminiń gramotasymen jalpy sany otyz azamat marapattaldy.
Aıta keteıik, atalmysh oqý orny 1937 jyly Shymkent pedagogıka ınstıtýty bolyp, 2011 jyly Elbasynyń tikeleı aralasýymen Ońtústik Qazaqstan memlekettik pedagogıkalyq ınstıtýty bolyp qaıta ashyldy. Aǵymdaǵy jyldyń 17 qarashasynda Úkimet qaýlysymen ınstıtýt - ýnıversıtet mártebesine ıe boldy.
