OQO-daǵy oqıǵa: Arýjan Saın balanyń isine Bas prokýrordyń aralasýyn surady
ALMATY. QazAqparat - Zorlyq kórdi degen ońtústikqazaqstandyq 7 jasar balanyń taǵdyryna alańdaǵan qoǵam belsendileri Almatyda baspasóz máslıhatyn ótkizdi, dep habarlaıdy QazAqparat tilshisi.
Qoǵam belsendisi Arýjan Saın QR Bas prokýrorynan oqýshyǵa qatysty isti óz baqylaýyna alýdy surady.
«Memlekettik organdar atalǵan isti barynsha obektıvti zerttese jaqsy bolar edi. Olar óz jumystaryn adal atqarsa degen tilek bar. Bizdiń pikirimiz, OQO ІІD bul isti tyndyra almaıdy. Sondyqtan, isti Іshki ister mınıstrligine jiberý týraly usynys aıttyq. Sondaı-aq balanyń quqyǵy qorǵalýy úshin Bas prokýror ony óz qadaǵalaýyna alsa deımiz», - dedi Saın.
Eske salaıyq, Saryaǵash aýdany Abaı aýylynda turatyn 7 jasar balanyń zorlanǵany týraly aqparat qoǵamda qyzý pikirtalas týǵyzdy. Balanyń ájesi quqyq qorǵaý organdaryna nemeresin joǵary synyp oqýshylary zorlap kelgenin aıtyp, aryzdanǵan.
Saryaǵash aýdandyq bilim bólimi sot-medıtsınalyq saraptama qorytyndysy boıynsha zorlyq faktisi rastalmaǵanyn atap ótti. Alaıda, qoǵam belsendileri júrgizilgen saraptamanyń obektıvtiligine senbeıdi.
Qazir bala Astanada. Onda keshendi ári tolyqqandy saraptama júrgizilip, sodan keıin ǵana sharalar qoldanylatyn bolady.
Aıta ketý kerek, daýly jaǵdaıdan soń OQO ákimi Janseıit Túımebaev birqatar sheneýnikke sógis jarııalap, jumystarynan shettetti. Abaı men Saryaǵash eldi mekenderinde polıtsııa qyzmetkerleri ornynan ketti. Saryaǵash aýdany ákimi men oblystyq bilim basqarmasynyń basshylary qatań sógis aldy. Oblystyq kámelettik jasqa tolmaǵandardyń isi boıynsha polıtsııa basshysy tártiptik jaýapkershilikke tartyldy. №73 jáne №74 mektep dırektorlary qyzmetterinen ýaqytsha shettetildi.
Birinshi synyp oqýshysyn uryp-soǵý jáne zorlaý faktisi boıynsha qylmystyq is qozǵaldy.
Foto: s3.amazonaws.com
