OQO-daǵy maqtaraldyq sharýalar 2766 tonna jemis pen júzim jınady
ASTANA. QazAqparat - Maqtaral aýdanynda qazirgi tańda jemis-jıdek pisip, dıqandar ónim jınaý kezeńin bastap ketti.
Olar jalpy kólemi 1005 gektar jerge egilgen jemis-jıdek pen júzimnen búginniń ózinde 2766 tonna ónim jınady, dep habarlaıdy OQO ákiminiń baspasóz qyzmeti.
Dıqandar otandyq naryqty qamtamasyz etýmen qatar jemis-jıdekterdi shetelderge eksporttaýda.
Osyndaı iri jemis-jıdek óndirýshilerdiń biri «Arsenal sad» óndiristik kooperatıvi. Jer aýmaǵy 350 gektardy quraıtyn baqta jemisterdiń barlyq túri ósiriledi. Máselen, baqtyń 110 gektaryna júzim, 100 gektaryna alma, 22 gektaryna shabdaly, 25 gektaryna qara órik, 10 gektaryna shıe egilgen.
Kúni keshe 60 tonna júzimdi Reseıge jibergen kooperatıv qazirgi ýaqytta shabdaly jınaý naýqanyn bastap jibergen. Shabdaly óniminiń basym bóligi Reseıge jiberiletin bolsa, qalǵany ishki naryqta saýdalanbaq.
Júzimniń ónimdiligi gektaryna 22 tonna ekenin aıtqan sharýa buryn júzimniń blekmeıdjık, vıktorııa sorttary týraly qazaqstandyq kásipkerler bilmeıtin, satyp alýǵa seskenetin edi, deıdi. Al, bıyl dál osy sorttarǵa degen qyzyǵýshylyq artypty. Óıtkeni baǵasy qoljetimdi, dámi til úıiredi. Eýropadan keletin ónimderge qaraǵanda áldeqaıda arzan eken.
Munda turaqty 150 adam jumyspen qamtylsa, naýqan kezinde 500-ge tarta jumysshylar jumysqa tartylady. Ónimderdi jınap, saraptap, sorttap, eksporttyq jáshikterge jaıǵastyrǵanǵa deıingi jumysty túgeldeı terimshiler atqarady. Árbir ónim uzaq jolda jaramsyzdanbaýy úshin olardyń jáshikterde durys ornalasýy erekshe mańyzǵa ıe.
«Arsenal sad» óndiristik kooperatıviniń baý-baqshasynda jas kóshetter daıyndalatyn arnaıy tálimbaq ta bar. Munda almanyń, almurttyń, alshanyń, qara óriktiń birneshe sorttary men dekaratıvti aǵashtardyń kóshetteri ósirilýde. Kóshetterge suranys óte joǵary. Endi qazaqstandyq dıqandar kóshet alyp kelý úshin shetel aspaıtyn bolady.
