OQO-daǵy kásiporyn operatsııa bólimine qajetti qural-jabdyqtar shyǵarady
ShYMKENT. QazAqparat - Ońtústik Qazaqstan oblysy densaýlyq salasyna qajetti kúrdeli jáne ozyq úlgidegi tehnıka men quraldardy shyǵarýda belsendilik tanytyp keledi.
Respýblıkany arzan baǵadaǵy medıtsınalyq buıymdarmen qamtamasyz etip otyrǵan «Kazmedpribor Holding» JShS-i 2005 jyly "Bıznestiń jol kartasy - 2020» memlekettik baǵdarlamasy aıasynda ashylǵan bolatyn. Búginde óndiris orny rentgen apparattary men medıtsınalyq jıhaz- jabdyqtar shyǵaryp, dárilik ónim óndirýmen aınalysady. Halyqaralyq standartqa sáıkestik sertıfıkatyn alǵan zaýyt búginde elimizdegi aýrýhanalar men emhanalardy ÝDZ apparatynan bastap operatsııa bólimine qajetti qural-jabdyqtaryna deıin qamtyp otyr. Sońǵy úlgidegi ınnovatsııalyq jobalardy iske asyrýda kásiporyn Japonııa, Ispanııa, Koreıa syndy alpaýyt memleketterdiń zaýyttarymen tyǵyz baılanysta jumys isteıdi. Búginde munda 150-ge jýyq adam eńbek etedi. Kásiporynnyń jumysymen tanysqan oblys ákimi Janseıit Túımebaev shyǵarylyp jatqan ónimderge joǵary baǵasyn berdi. Óndiristik bóligin aralap kórip, dári-dármek pen medıtsınalyq qural-jabdyqtyń óndirilý barysyn kórip shyqty.
«Kásiporynnyń jumysy júıeli. Ónimderi de suranysqa ıe. Munda jasalynatyn qondyrǵylar ozyq sheteldik qurylǵylardan kem túspeıdi. Qanshama otbasyny jumyspen qamtyp, tabysyn eselep otyr. Eń bastysy - kásiporyn basshylyǵynda izdenis pen umtylys bar», - dedi Janseıit Qanseıituly.
Qazirgi tańda "QazMedPrıbor" mekemesinde medıtsınalyq qural-jabdyqtyń 400-den asa túri shyǵarylady. Jalpy zaýyt jylyna 60 myń dana medıtsınalyq tehnıkany shyǵarýǵa qaýqarly. Sondaı-aq, munda jedel-járdem kóligine qajetti quraldardan bólek, elektrokardıograftar, medıtsınalyq monıtorlar jasalady. Ári sapaly, ári baǵasy kóńilge qonymdy kásiporynnyń ónimine degen suranys jyl sanap artyp keledi. Búginde zaýyt ónimderine Reseı, Ózbekstan, Tájikstan men Túrkimenstan syndy kórshiles elderden suranystar túse bastaǵan.
