OQO-daǵy ınkýbatordan tabıǵat aıasyna jylyna 600-den astam dýadaq ushyrylady
ShYMKENT. QazAqparat - Ońtústik Qazaqstan oblysynda arab ınvestorlarynyń kómegimen dýadaq ósirilýde. Báıdibek aýdanynda arab ınvestory Sheıh Halıfa Ben Zaıd Al-Nahaııannyń qoldaýymen qurylǵan qus tuqymbaǵynan tabıǵat aıasyna jylyna 600-den astam dýadaq ushyrylady, dep habarlaıdy QazAqparat HAA tilshisi.
Búgingi tańda 895 gektar jer kólemin alyp turǵan ortalyqqa 3,5 mlrd teńge shetel ınvestıtsııasy tartylǵan. Ári aýdannyń 156 turǵyny osy jerden turaqty jumys taýyp otyr. Atalmysh ınkýbator sońǵy úlgidegi qural-jabdyqtarmen jaraqtandyrylǵan. Munda ósirilip jatqan qustar onlaın rejımde baqylanyp, olarǵa jem-sý bekitilgen tártippen beriledi. Jalpy tuqymbaqtaǵy dýadaqtar óńirdiń Sozaq aýdanyndaǵy Betpaqdala aımaǵyna jiberiledi. Arab tarapy Qazaqstan aldyndaǵy óz mindetin oryndaý úshin 2010-2017 jyldar aralyǵynda Qazaqstannyń tabıǵatyna barlyǵy 2 myńǵa jýyq dýadaq ushyrǵan.
«Aldaǵy 2016-2018 jyldary jobanyń úshinshi kezeńin júzege asyrý maqsatynda 13 mlrd. teńge shetel ınvestıtsııasy tartylǵan. Eger úshinshi kezeń eńserilse, jylyna 15 myńǵa jýyq dýadaq ushyrý josparlanyp otyr. Sondaı-aq jumysshylar sanyn 400-ge jetkizý kózdelýde»,- deıdi tuqymbaq ortalyǵynyń basqarýshy dırektory Roman Bakıev.
Aıta keteıik, mundaı ınkýbatorlar álemniń úsh elinde ıaǵnı, Morokko, Birikken Arab Ámirligi men Qazaqstanda ǵana bar. 2005-2006 jyldary Qazaqstan men Birikken Arab Ámirligi elimen ózara kelisim negizinde jabaıy dýadaqtyń uıasynan jumyrtqasy alynyp, ınkýbatsııadan keıin qustardy Birikken Arab Ámirliginiń ornıtologııalyq baǵyna jetkizilgen bolatyn. Sodan beri dýadaq qusy burynǵy Otany - Qazaq jerinde de ósirile bastady.
