OQO-daǵy Birkólik shatqalynda týrıster adasyp, taýdan túse almaı qalǵan
ShYMKENT. QazAqparat - OQO-daǵy Birkólik shatqalynda týrıster adasyp ketken. 5 adamnan quralǵan top taýdan túse almaı, kún batqanda qutqarýshylardy kómekke shaqyrtty, dep habarlaıdy QazAqparat HAA tilshisi.
Habar keshki ýaqytta túskendikten qutqarýshylar tańǵa deıin jigittermen baılanysta bolyp, olarǵa ózderin qalaı ustaý kerektigi týraly nusqaý berip otyrǵan. Olarǵa jol júrýdi toqtatyp, qutqarýshylardy kútý qajettigin túsindirgen. Al, tańǵy 05.25-te oqıǵa ornyna oblystyq TJ departamenti jedel-qutqarý jasaǵynyń 5 qutqarýshysy, Tólebı aýdany TJ bóliminiń 2 qyzmetkeri attanyp ketti.
Birkólik shatqalyna jetken qutqarýshylar Saryaǵash aýdanynan kelgen 5 adamnyń qaı jerde turǵanyn anyqtady. Belgili bolǵandaı, taýda demalǵysy kelgender aldyn ala eshkimdi eskertpeı, ózderi bilmeıtin baǵytqa ketip qalypty. Sóıtip, 24-29 jas aralyǵyndaǵy týrıster shatqaldaǵy Galkın jáne Chaınık jartastarynyń arasynda qalyp qoıyp, sol jerden ózdiginen túse almaı turǵan. Qutqarýshylar olardy tańǵy segizder shamasynda taýyp alyp, qaýipsiz jerge túsirdi. Bes jigit te ózderin jaqsy sezingen, eshkimge medıtsınalyq kómek qajet bolmaǵan.
