OQO-daǵy bilim salasynda tsıfrlandyrý júıesi sátti iske asyrylýda

ShYMKENT. QazAqparat - Ońtústik Qazaqstan oblysyndaǵy bilim salasynda tsıfrlandyrý júıesi sátti iske asyrylýda. Óńirde ótken jyly balalardy mektepke elektrondy túrde qabyldaý júıesi engizilgen. Bul týraly oblystyq bilim basqarmasynyń basshysy Isataı Saǵyndyqov málimdedi, dep habarlaıdy QazAqparat.

Elbasy halyqqa arnaǵan Joldaýynda «Elimizdiń jańa álem kóshbasshylarynyń qataryna qosylýy úshin birinshi mindet ındýstrııalandyrý men jańa tehnologııalardy engizýdiń kóshbasshysyna aınalýy tıis» - degen bolatyn. Qazir bul tapsyrma ońtústik óńirdegi bilim berý salasynda jospar boıynsha oryndalýda.

Basqarma basshysynyń aıtýynsha, tsıfrlandyrý balalardy mektepke ornalastyrýda ashyqtyqty, aıqyndyqty qamtamasyz etýde tıimdi sanalady. Ári adamı faktordyń jaǵdaıǵa yqpal etýine jol bermeıdi. Byltyrǵy jyly jańa júıeniń kómegimen qala mektepteriniń 1-synybyna 21 945 oqýshy qabyldansa, 23 395 búldirshin balabaqshaǵa barýǵa múmkindik alǵan.

«Tsıfrlyq bilim berý resýrstaryn damytý arqyly oqytýdyń mazmundylyǵyna, sybaılas jemqorylyqtyń aldyn alýǵa baǵyttalǵan jumystarǵa kóńil bólý máselesi de qolǵa alyndy. Aıtalyq, muǵalimderdi irikteýdegi ashyq konkýrs, oqýshylardyń mekteparalyq aýystyrý jáne jeke is-paraǵyn júrgizý protsesteri elektrondy túrde atqarylýda», - dedi basqarma basshysy Isataı Ómirzaquly.

Qazirgi tańda Shymkent qalasyndaǵy bilim berý mekemelerine ustazdardy qabyldaý jumystary da elektrondy júıege aýysqan. Jumys izdegen kez-kelgen azamat www.thunter.shymkent.gov.kz saıtyna kirip, muǵalimder úshin qandaı bos jumys oryndary jarııalanǵanyn bile alady jáne qujat tapsyrýǵa múmkindik alady. Búgingi kúnge deıin jańa júıemen 501 pedagog jumysqa qabyldanyp otyr.

«Bul júıe mektepterdegi oqý-tárbıe isinde de tıimdi paıdalanylýda. Atap aıtsaq, qaladaǵy 40 bilim uıasyna elektrondy basqarý apparattyq-baǵdarlamalyq kesheni engizilgen. Jańa júıe ornatylǵan mektepterge júrgizilgen taldaý jumystarynyń qorytyndysy boıynsha aldyńǵy jyldarmen salystyrǵanda jylynda sabaqtan sebepsiz qalý deńgeıi 75%-ǵa kemip, oqýshylardyń úlgerimi 12%-ǵa paıyzǵa joǵarylaǵan»,- deıdi basqarma basshysy.

Aıta keteıik, jobanyń nátıjesinde óńirde balabaqshaǵa joldama alý, qyzmetke turýda para talap etý, balalardy mektepke ornalastyrýda tamyr-tanystyqqa jol berý týraly narazylyq bildirgen qala turǵyndarynyń aryz-shaǵymdar aıtarlyqtaı tómendegeni baıqalady.