OQO-daǵy basqarma basshylary 77 azamattyń aryz-shaǵymyn tyńdady
ShYMKENT. QazAqparat - Ońtústik Qazaqstan oblysy ákimdiginiń basqarma basshylary «Nur Otan» partııasy oblystyq fılıalynyń ǵımaratynda qoǵamdyq qabyldaý ótkizdi.
Jańa formatta ótken kezekti sharada oblystaǵy bes basqarmanyń basshylary qatysyp, azamattardyń aryz-shaǵymdaryn tyńdady, dep habarlaıdy QazAqparat tilshisi.
Oblystyq jumyspen qamtýdy úılestirý jáne áleýmettik baǵdarlamalar men Eńbek ınspektsııasy jónindegi basqarmasynyń ókilderi turǵyndarmen kezdesip, máselelerin qarady. Bul sharaǵa Oblystyq jer qatynastary men jer ıspektsııasy jáne Otbasy, balalar men jastar isteri jónindegi basqarma basshylary da arnaıy qatysty. Qabyldaýǵa túrli túıtkilderimen 77 azamat keldi.
Basqarma basshylaryna aryz-shaǵymdaryn tikeleı betpe-bet jetkizýge múmkindik alǵan azamattardyń basym bóligi jeke máselelerin ortaǵa saldy. Solardyń biri - shymkenttik azamatsha Qaınarbulaq eldi mekenindegi aýyl sharýashylyq maqsatyndaǵy jer ýchaskelerine turǵyn úı salýǵa ruqsat alǵysy keledi. Al, Saǵıla Jasqaraeva Aqtas móltekaýdanyndaǵy jeke menshik úıiniń qujattaryn rásimdeýge kómek surasa, Nurlygúl Turysbaeva esimdi azamatsha jumystan zańsyz bosap qalǵanyn jetkizdi. Basqarma basshylary turǵyndardy tyńdaı kele, olardyń muqtajdyqtaryn zań aıasynda qarap, ońtaıly sheshýge yqpal etetindikterin málimdedi.
«Jer ınspektsııasy men Jer qatynastary basqarmasyna 40-qa jýyq azamattyń aryzy tirkeldi. Jumyspen qamtýdy úılestirý jáne áleýmettik baǵdarlamalar basqarmasyna 16, Otbasy, balalar men jastar isteri jónindegi basqarmaǵa 12, al Eńbek ınspektsııasy basqarmasyna 10 adam kelip máselesin sheship berýdi ótindi», - deıdi «Nur Otan» partııasy oblystyq fılıaly qoǵamdyq qabyldaý bólmesiniń meńgerýshisi Berik Quljanov.
Aıta keteıik, qoǵamdyq qabyldaý oblys ákiminiń tapsyrmasymen tórtinshi ret ótkizilip otyr. Búginge deıin 18 basqarma basshysy azamattardyń aryz-shaǵymdaryn tyńdaǵan bolatyn. Jańa formattaǵy sońǵy is-shara 8 aqpanǵa jsoparlanýda. Endigi kezekte turǵyndar ekonomıka jáne bıýdjettik josparlaý, qarjy, memlekettik satyp alý, memlekettik sáýlet-qurylys baqylaý, energetıka jáne turǵyn úı kommýnaldyq sharýashylyq máselelerine qatysty aryzdana alady.
