OQO-daǵy aýyldarda 107 ákim saılandy
ShYMKENT. QazAqparat - Ońtústik Qazaqstan oblysynda 7-24 tamyz kúnderi aralyǵynda aýyldyq okrýg ákimderin saılaý naýqany ótti. Oblystyq saılaý komıssııasynyń tóraǵasy Álibek Ómirálıev saılaýdyń qorytyndysymen tanystyrdy, dep habarlaıdy QazAqparat HAA tilshisi.
Álibek Kádenulynyń aıtýynsha, óńirde saılaý 107 okrýg boıynsha ótken. Onda 320 úmitker tirkelipti. Aralarynda 18-i áıel de bar. Tirkelgenderdiń 264-i «Nur Otan» partııasynyń músheleri sanalady. Al, qalǵandary partııalylyǵyn kórsetpegen. Bıyl dodaǵa túskenderdiń basym kópshiligin jasy elýden asqan azamattardy qurady
«Saılaýdyń qorytyndysy boıynsha 107 ákim saılandy. Saıası naýqan erejege saı ótti. Naýqan barysynda aýdandyq, qalalyq saılaý komıssııalary jumys istedi. Saılaýda úmitkerler belsendilik tanytyp, olardyń arasynda shynaıy báseke boldy. Saılanǵan aýyl ákimderdiń arasynda eń jasy Otyrar aýdany, Shilik aýylynyń ákimi - J.Seıitjanov. Jansultan Ádiljanuly 25 jasta. Al, ákimder arasynda eń jasy úlkeni Maqtaaral aýdanynda tirkelgen. Maqtaly aýyl okrýginiń ákimi 62 jasta. 107 ákimniń 68-i qaıta saılansa, qalǵandary aýyl ákimi laýazymyna alǵash ret kiristi»,- dedi oblystyq saılaý komıssııasynyń tóraǵasy.
Aıta keteıik, Memleket basshysy N.Nazarbaevtyń Jarlyǵyna sáıkes, 2013 jyldan beri aýyl ákimderin saılaý ótkizilip keledi. Sol jyly respýblıka boıynsha 181 aýyl okrýginiń ákimi saılandy. Aýyldyq okrýg ákiminiń basqa jumysqa aýysýy, zeınetkerlikke shyǵýy, qonys aýdarýy, densaýlyǵynyń syr berýi sııaqty ártúrli sebepterge baılanysty bosaǵan oryndaryna 2014 jyly -8, 2015 jyly -24, al, ótken jyly -42 aýyl okrýgi ákimderi saılanǵan.
